पोखरा, १० माघ – पश्चिमी वायुको प्रभावका कारण बुधबार रातीदेखि बर्षा भएपछि बुधबार बिहान ११ बजेसम्म पोखराको तापक्रम १२ डिग्री सेल्सियस छ।

देशका अधिकांश भेगमा वर्षा शुरु भएपछि वायुको प्रभाव परेको छ। वायुको प्रभावले माथिल्लो हिमाली क्षेत्रका सबै भागमा हिमपात परेको छ। मंगलबार राति देशको पश्चिमी भेगबाट प्रवेश गरेको सो वायु मध्य हुँदै अहिले पूर्वी भेगसम्म प्रभाव जमाइसकेको छ।

साँझसम्म यो वायुको प्रभाव कम हुने र बिहीबारदेखि मौसममा सुधार आउने मौसमविद्हरुको भनाइ छ । बुधबार काठमाडौँ उपत्यकाको तापक्रम ७.३ डिग्री सेल्सियस भएपनि दिउँसो अधिकतम तापक्रम घट्ने भएकाले जाडो बढ्ने मौसम पूर्वानुमान महाशाखाले जनाएको छ।

मौसम पूर्वानूमान महाशाखाको पछिल्लो विवरण अनुसार वीरेन्द्रनगरबाहेक सबै स्थानमा वर्षा भएको छ। बुधबार, काठमाडौ उपत्यकामा दुई मिलीमिटर वर्षा भएको थियो। सबैभन्दा बढी डडेल्धुरामा १२ मिलीमिटर वर्षा भएको थियो।

पोखरा न्युज डटकमबाट