पहिरो जाँदा कास्कीको अन्नपूर्ण स्थित किम्रुङ खोला थुनिएको छ भने तल्लो तटीय क्षेत्र कालिगण्डकी दोभानसम्म सतर्कता अपनाउन अनुरोध गरिएको छ।

बाढी पूर्वानुमान महाशाखाले मंगलबार राति ८:४० बजे सूचना जारी गरी किम्रुङ खोला थुनिएकाले बाढीको जोखिम रहेको जनाएको छ। महाशाखाका अनुसार, जिल्ला प्रशासन कार्यालय, कास्कीले किम्रुङ खोला थुनिएको जानकारी दिएको छ।

कास्कीको अन्नपूर्ण गाउँपालिका-११ स्थित किम्रुङ खोलामा पहिरो गएको हो। यो मोदी खोलाको सहायक खोला हो।

पहिरोले थुनिएको किम्रुङ खोलका कारण बाढीको जोखिम रहेको महाशाखाले कालिगण्डकी दोभानसम्मको तल्लो तटीय क्षेत्रमा पर्ने नयाँपुल, वीरेठाँटी र आसपासको बस्तीका बासिन्दा सुरक्षित स्थानमा जान अनुरोध गरेको छ।

‘किम्रुङ खोलामा पहिरो खसेर खोला थुनिएकोले हाललाई अर्को सूचना जारी नहुँदासम्म कालिगण्डकी दोभानसम्मको तल्लो क्षेत्र नयाँपुल, बिरेठाँटी र आसपासका बस्तीका बासिन्दालाई सुरक्षित स्थानमा जान अनुरोध छ,’ महाशाखाले भनेको छ।

यससँगै मोदी नदी करिडोरमा आवागमन नगर्न पनि महाशाखाले सचेत गराएको छ।