लगातारको वर्षा, बाढी, पहिरो तथा विपद्को जोखिमलाई मध्यनजर गर्दै स्याङ्जाको चापाकोट नगरपालिकाले नगर क्षेत्रका सबै विद्यालयमा एक दिन पठनपाठन बन्द गर्ने निर्णय गरेको छ ।

नगरपालिकाले बिहीबार जारी गरेको सूचनाअनुसार चापाकोटभित्र सञ्चालनमा रहेका सामुदायिक तथा संस्थागत विद्यालयमा असोज ९ गते एक दिन बिदा दिइएको हो ।

नेपाल सरकार, शिक्षा तथा खेलकुद मन्त्रालयको असोज ७ गतेको पत्रअनुसार स्थानीय तहको समन्वयमा विद्यालय बिदा गर्न अनुरोध भएसँगै नगरपालिकाले यस्तो निर्णय गरेको जनाएको छ । देशभर निरन्तर वर्षा, बाढी, पहिरो तथा अन्य विपद्को जोखिम बढिरहेको अवस्थालाई ध्यानमा राखेर विद्यार्थी, शिक्षक तथा कर्मचारीको सुरक्षालाई प्राथमिकता दिइएको नगरपालिकाले जनाएको छ ।

असोज ९ गते दिइएको एक दिनको बिदा आगामी हिउँदे वा जाडो बिदाबाट कट्टा हुने गरी समायोजन गर्न विद्यालयहरूलाई निर्देशन दिइएको नगरपालिकाका प्रमुख प्रशासकीय अधिकृत ज्ञानराज कोइरालाले जानकारी दिए ।

बिदाको अवधिमा विद्यार्थी, शिक्षक तथा कर्मचारीको सुरक्षा र विपद् जोखिम न्यूनीकरणलाई उच्च प्राथमिकता दिन भनिएको छ । नदी, खोला, पहिरो तथा अन्य जोखिमयुक्त क्षेत्रमा नजान सम्बन्धित विद्यालय र सरोकारवालालाई आवश्यक सूचना प्रवाह गर्नसमेत नगरपालिकाले आग्रह गरेको छ ।

नगरपालिकाले जोखिमयुक्त क्षेत्रमा रहेका विद्यालय तथा समुदायलाई मौसमको अवस्था र सम्भावित विपद्बारे सचेत रहन अनुरोध गरेको छ ।