काठमाडौं । प्रतिनिधिसभा विघटनको विरोधमा आन्दोलन गर्दै आएको नेकपाको दाहाल–नेपाल पक्षले आईतबार माईतीघर मण्डलमा धर्ना दिएको छ ।

धर्नामा सो पार्टीका अध्यक्ष पुष्पकमल दाहाल प्रचण्ड, माधवकुमार नेपाल, वरिष्ठ नेता झलनाथ खनाल, प्रवक्ता नारायणकाजी श्रेष्ठ लगायत नेता कार्यकर्ताको सहभागिता रहेको छ । नेताहरु सडकमा पलेटी कसेर बसे । धर्नामा सहभागी नेता तथा कार्यकर्ताले प्रतिनिधिसभा विघटनको विरोधमा नारा लगाएका छन् ।

झलनाथको टिप्पणी : ‘ओली सरकार पाकेको फलझैं झर्छ, दिनगन्ती सुरु’

नेपाल कम्युनिष्ट पार्टी (नेकपा) का दाहाल–नेपाल समूहका वरिष्ठ नेता तथा पूर्व प्रधानमन्त्री झलनाथ खनालले अब केपी ओलीको दिनगन्ती सुरु भएको टिप्पणी गरेका छन् ।

आज (आइतबार) माइतीघरमा आफ्नो समूहले गरेको धर्ना कार्यक्रममा सहभागी हुँदै नेता खनालले मिडियासँगको कुराकानीमा ओलीको दिनगन्ती सुरु भएको बताएका हुन् । खनालले ओलीले गरेको प्रतिनिधिसभा विघटन असंवैधानिक कदम सच्याएर छोड्ने पनि दाबी गरे ।

उनले प्रतिनिधिसभा पूनःस्थापना हुने पनि विश्वास दिलाए । उनले भने,‘केपी ओली नेतृत्वको यो सरकार पाकेको फलझैँ झर्छ ।’