प्रधानमन्त्री एवं नेकपा (एमाले) अध्यक्ष केपी शर्मा ओली र वरिष्ठ नेता माधवकुमार नेपालबीचको वार्ता बिनानिष्कर्ष टुंगिएको छ । भेटवार्तामा दुबै नेताले आ-आफ्नो अडान नछोडेपछि कुनै ठोस सहमति हुन सकेन ।

नेकपा एमाले भित्रको विवाद समाधानका लागि गठित कार्यदल व्यूँताएर लगातार ३ दिनसम्म बसेको औपचारिक छलफलपछि बुधबार ओली र नेपालबीच भेटवार्ता भएको हो ।

राजधानीको नक्सालस्थित मेरियट होटलमा भएको वार्तामा प्रधानमन्त्रीसमेत रहेका अध्यक्ष ओलीले नेपालसमक्ष विपक्षी गठबन्धन छोडेर आफूलाई निःशर्त सहयोग गर्न भनेका थिए। तर उनले जेठ २ को विषयमा कुनै कुरा ननिस्किएपछि नेता नेपाल सहमत नभएको स्रोत बतायो।

‘तपाईहरु विपक्षी गठबन्धनमा लाग्नुभयो। त्यसलाई छोड्नुपर्छ। विपक्षी गठबन्धनले मलाई अफ्ठेरोमा पारिरहेको छ।त्यसलाई छोडेर मलाई सहयोग गर्नुहोस्। म अफ्ठ्यारोमा छु’, छलफलमा ओलीले नेपालसमक्ष राखेको कुराबारे स्रोतले भन्यो।

भेटमा ओलीले जेठ २ को वरिपरि कसरी जाने भन्ने विषयमा कुरै नभएको स्रोतले दाबी गर्‍यो। वार्तामा सहभागी नेता भीम रावलले पार्टी एकतालाई निष्कर्षमा पुर्‍याउन दुवै नेता सकारात्मक भएको दाबी गरे । उनका अनुसार बिहीबार कार्यदलको बैठकपछि ओली र नेपालबीच पुनः वार्ता हुने भएको छ ।

‘समग्रतामा पार्टी एकतालाई कसरी अगाडि बढाउने, सकारात्मक परिणाम कसरी ल्याउने भनेर छलफल भएको छ । पुनः कुराकानी हुनेछ । हामीले समस्याका विषयमा गम्भीर रुपमा कुराकानी गर्नुपर्ने आवश्यकता बोध गर्दै आएका छौं । अब कार्यदलका बीचमा छलफल हुन्छ,’ वार्तापछि रावलले भने ।

ओली र नेपालबीच केहीबेर वान अन वान वार्तापछि कार्यदल सदस्यहरु पनि सहभागी भएका थिए । तर, वार्तामा ठोस सहमति भने जुट्न सकेन । यद्यपि नेता सुरेन्द्र पाण्डेले वार्ता सकारात्मक भएको र अब बाँकी कार्यदलले टुंग्याउने बताए ।