नेपाली राष्ट्रिय फुटबल टिमका मुख्य प्रशिक्षक अब्दुल्लाह अल्मुताइरीले नेपाली फुटबलमाथि अन्याय भएको बताएका छन् । आज हुने भारतविरुद्धको फाइनल खेलमा सहभागी हुन नपाउने भएपछि अल्मुताइरीले नेपाल दक्षिण एसियाली फुटबल (साफ)ले आफैँले बनाएको नियमको पालना नगरेको बताएका छन् ।

प्रतिबन्धपछि आयोजित भर्चुअल प्रत्रकार सम्मेलन मार्फत उनले आफूमाथिको कारबाही व्यक्तिगत मात्र नभएर नेपाली राष्ट्रिय टोलीको प्रशिक्षकमाथि र नेपाली फुटबलमाथिको कारबाही भएको समेत प्रतिक्रिया दिएका छन् ।

“साफले आफैँले बनाएको नियमको पालना गरेन । यदि उनीहरू हाम्रो प्रतिद्वन्द्वीले जितोस् भन्ने चाहन्छन् भने ट्रफी नै दिँदा हुन्छ । तर, म सत्यका लागि लड्नेछु,” उनले भने।

साफले एकपक्षीय निर्णय गरेको उनको आरोप थियो। साफले गरेको अन्यायविरुद्ध आफू कोर्ट अफ आर्बिट्रेसन इन स्पोर्ट्स (कास)मा समेत जाने उनले बताए।