बाम गठबन्धनको नेतृत्व एमाले अध्यक्ष केपी शर्मा ओली र काँग्रेसको लोकतान्त्रिक गठबन्धनको नेतृत्व काँग्रेस सभापति शेरबहादुर देउवाले गरिरहेका छन् । उनीहरुलाई चुनावी सभामा सम्बोधन गर्न भ्याई नभ्याइ छ । निकै दौडधुपका साथ हेलिकोप्टरबाटै जिल्ला जिल्लामा पुगी कुरा राखिरहेका छन् ।

शनिबार पनि उनीहरु जिल्ला दौडाहमा रहे । पोखरामा एमाले अध्यक्ष केपी शर्मा ओलीले माईकको गुनासो गरिरहँदा पाल्पामा देउवाले प्राविधिकसँग उस्तै गुनासो गरिरहेका छन् ।

बाम गठबन्धनले पोखरामा शनिबार आयोजना गरेको चुनावी सभामा बोल्न सुरु गरेपछि ईको साउण्ड आयो भन्दै पटक पटक प्राविधिकलाई भनिरहेका थिए । ओलीले पाँच मिनेट बोलेपछि ‘बढी ईको भयो ध्यान दिऔं’ भन्दै एकछिन रोकिए । ‘हेल्लो, खै भएन । खैर जे होस्, भएन । आवाज बढाऔं, ईको घटाऔं ।’ पटक पटक भनेर एकछिन हँसाए पनि ।

वक्ताका लागि अर्को पोडियमको व्यवस्था थियो । तर ओली सिधै कार्यक्रम सञ्चालक पार्टी कास्की कार्यवाहक अध्यक्ष दामोदर बैरागीले बोल्ने ठाउँमा गई भाषण सुरु गरेका थिए । उनीपछि बोलेका माओवादी केन्द्रका वरिष्ठ नेता रामबहादुर थापा बादल भने वक्ताकै लागि ठीक पारिएको पोडियमतर्फ अघि बढे । उनले त्यतै आफ्ना भनाई राखे ।

प्रधानमन्त्रीले प्राविधिकलाई भने : ए भाइ के गरेको ? म बोल्दैछु, खाली बिगारेछ, बिगारेछ

प्रधानमन्त्री शेरबहादुर देउवाले माइक बिगारेको भन्दै प्राविधिकलाई गाली गरे । नेपाली कांग्रेस क्षेत्र नम्बर –२, पाल्पाले शनिबार रैनादेवी छहरा –५, मुझुङ्गमा आयोजना गरेको चुनावी सभालाई सम्बोधन गर्ने क्रममा माइकमा ईको बढेर चुर्इंचुर्इं गरेपछि प्रधानमन्त्रीले प्राविधिकलाई गाली गरेका हुन् ।

दर्शकले प्रधानमन्त्रीले बोलेको कुरा नबुझेको गुनासो गरेपछि प्राविधिकले माइक मिलाउने क्रममा च्वाईच्वाई ,चुईंचुर्इंको आवाज आएको थियो ।‘ए भाई के गरेको ? खाली बिगारेछ, बिगारेछ’, प्रधानमन्त्री देउवाले आदेश दिदै भने–‘अलि मिलाउ, म बोल्दैछु ।’ निकै रिसाएको आवाजमा प्रधानमन्त्रीको आदेश आएपछि चुनावीसभाको सुरक्षामा खटिएका पाल्पाका प्रहरी प्रमुख डिल्लीराज पन्तलगायतका सुरक्षा टोली प्राविधिकसम्म पुगेका थिए ।

नवलपरासीमा आयोजित चुनावी सभा सकेर हेलिकप्टरमार्फत कार्यक्रमस्थल मुझुङ्ग पुगेका देउवाले लगत्तै आयोजकलाई छिटो कार्यक्रम सक्न निर्देशन दिइरहेका थिए । पटकपटक घडी हेर्दै पार्टीका जिल्ला सभापति वीरबहादुर रानामार्फत छिटो कार्यक्रम सकाउन आग्रह गरेका देउवाले पार्टी उपसभापति रामचन्द्र पौडेलले बोलेपछि सभालाई सम्बोधन गरेका थिए । बोलेको तीन मिनेट नहुँदै माइकमा समस्या आएपछि देउवाले प्राविधिकलाई सच्याउन निर्देशन दिए ।