गण्डक न्युज पोखरा, ८ चैत / पोखरा लेखनाथ महानगरपालिका वडा नं. ९ का ज्येष्ठ नागरिकलाई विहीबार एक समारोह आयोजना गरी सम्मान गरिएको छ । वडाका चार दर्जन बढी ज्येष्ठ नागरिकलाई दोसल्ला र कदरपत्रका साथ सम्मान गरिएको हो ।

पोखरा लेखनाथ महानगरपालिका वडा नं. ९, ज्येष्ठ नागरिक सम्मान समितिले आयोजना गरेको सो समारोहमा प्रमुख अतिथि महानगरपालिकाका प्रमुख मानबहादुर जिसी, विशेष अतिथि समाजसेवी बसन्तकेशव पराजुली, शिक्षा सेवी गणेशबहादुर गुरुङ लगायतले ८४ वर्ष कटेका ज्येष्ठ नागरिकलाई सम्मान गरेका थिए ।

प्रमुख अतिथि मेयर जिसीले आफू मेयर हुनुपूर्व आफू र पार्टीले ज्येष्ठ नागरिकलाई प्रदान गर्ने भत्ता बढाउने प्रतिबद्धता जनाएको स्मरण गरे । उनले ज्येष्ठ नागरिकलाई हरेक दुई महिनामा स्वास्थ्य जाँच गर्ने गरेको जनाउँदै जनशक्ति तयार हुनासाथ हरेक महिना महानगरपालिकाभित्र स्वास्थ्य जाँचको प्रबन्ध गर्ने प्रतिबद्धता व्यक्त गरे ।

वडा सचिव लोकदर्शन कोईराला, विश्व शाक्य लगायतले ज्येष्ठ नागरिकलाई हेला गर्न नहुने बताए । समितिका अध्यक्ष केशवराज भण्डारीको अध्यक्षतामा भएको कार्यक्रममा वडा सदस्य नन्दुराम गिरीले स्वागत तथा समिति सचिव नरेन्द्रमान लालचनले सञ्चालन गरेका थिए ।