गण्डक न्युज पोखरा, १५ वैशाख । पोखरामा सवारी दुर्घटना न्यूनिकरण गर्न सचेतनामुलक कार्यक्रम सहित एक हप्तासम्म ट्राफिक सप्ताह गरिने भएको छ ।

जिल्ला ट्राफिक कार्यालय कास्की र नेपाल रेडक्रस सोसाइटी कास्कीको संयुक्त आयोजनामा यही वैशाख १७ देखि २३ गतेसम्म ट्राफिक सम्बन्धि विभिन्न सचेतनामुलक कार्यक्रम आयोजना गरिने पोखरामा आयोजित पत्रकार सम्मेलनमा जानकारी दिइयो ।

सोमबार देखि शुरु हुने ट्राफिक सप्ताहमा प्रभातफेरी देखि चालक परामर्श, पर्चा पम्प्लेट वितरण, आमा समूह तथा कक्षा ९ र १० का विद्यार्थीलाई ट्राफिक सचेतना, जेब्राक्रसमा स्वयम्सेवक परिचालन, रेडियो संवाद, प्याराग्लाइडिङ चालक तथा ड्राइभिङ इन्स्टिच्युटहरुलाई सचेतना कक्षा लगायतका कार्यक्रम आयोजना गरिने जिल्ला ट्राफिक कार्यालय कास्कीका प्रमुख प्रहरी निरीक्षक ऐन बहादुर मल्लले बताए ।

बैशाख १७ गते प्रभात फेरी, पर्चापम्लेट वितरण, चालक परामर्श, बैशाख १८ गते जेब्राक्रस स्वयमसेवक परिचालन तथा अमरसिंह मावि र महेन्द्र माविका कक्षा ९ र १० का विद्यार्थीलाई सचेतना कक्षा, रेडियो सम्बाद, बैशाख १९ गते ड्राइभिङ इन्स्टिच्युट समितिका प्रतिनिधीहरुलाई सचेतना गराउने कार्यक्रम तय गरिएको प्रहरी निरीक्षक मल्लले बताए ।

त्यसै गरी, बैशाख २० गते प्याराग्लाइडिङ चालकहरुलाई ट्राफिक सचेतना र प्यारामाउण्ड बोर्डिंङ स्कुलमा सचेतना कक्षा, चालक परामर्श, बैशाख २१ गते आमा समूहहरुलाई सचेतना कक्षा, चालक परामर्श, बैशाख २२ गते चालकका लागि ट्राफिक कक्षा, बाराही उच्च माविमा सचेतना कक्षा र बैशाख २३ गते फिल्म हलहरुमा अडियो क्लिप शो सहित समापन गरिने प्रहरी निरीक्षक मल्लले बताए ।

सवारी दुर्घटना ठुलो विपद्को रुपमा रहेको जिल्ला प्रहरी कार्यालय कास्कीका प्रमुख एवम प्रहरी उपरीक्षक अशोक सिंहले बताए । लापरवाहीकै कारण अधिकाशं सडक दुर्घटना भएको दाबी गर्दै एसपी सिंहले विभिन्न ठाँउमा चेकिङ गर्दा गल्ति गरेको भेटेमा ठाँउको ठाँउ नै कारवाही गर्ने जनाए ।

नेपाल पत्रकार महासंघ कास्कीका अध्यक्ष दीपेन्द्र श्रेष्ठले पोखराको मार्गचित्र बनाएर मात्र ट्राफिक व्यवस्थापनमा केन्द्रित हुनु पर्ने सुझाव दिदै पछिल्लो समयमा पोखरामा ट्राफिक जाम हुन सुरु भएकोमा चिन्ता व्यक्त गरे । नेपाल रेडक्रस सोसाइटी कास्कीका मन्त्री धर्मराज अधिकारीले सवारीी दुर्घटनाबाट दैनिक औषतमा ६ जनाको ज्यान जाने गरेको उल्लेख गर्दै सावधानी अपनाउनुपर्ने खाँचो औंल्याए ।

क्याप्सनः
वैशाख १७ देखि २३ गतेसम्म ट्राफिक सम्बन्धि विभिन्न सचेतनामुलक कार्यक्रम आयोजना गरिने बारे जानकारी गराईदै
तस्विरः रञ्जन अधिकारी आदर्श समाज