अश्विन दानी, गोरखा । धन कमाउन साउदी अरब पुगेका गोरखाका एक जनाको मृत्यु भएको छ । केही समय अघि साउदी पुगेका शहिद लखन गाउँपालिका ४ स्थित तीनमानेका कृष्ण थापाको गत शनिबार कामबाट फर्कँदै गर्दा सवारीले ठक्कर दिँदा मृत्यु भएको जानकारी आएको उनका भाई काजी थापाले जानकारी दिए ।

‘मलाई फोन गर्ने मान्छेको नाम याद भएन’ काजीले आँखा भरी आँसु पार्दै भने ‘कहिल्यै नचिनेको नम्बरबाट फोन आयो । दाईकै फोन जस्तै लागेर उठाएको थिएँ । त्यहि नयाँ नम्बरबाट फोन गर्ने मान्छेले एक्कासी दाईको दुर्घटनामा परि मृत्यु भयो भन्ने खबर सुनाए ।’ त्यो खबर सुनेपछि केही समय आफुलाई समाल्नै नसकेको उनले बताए । कृष्णको मृत्यु भएको खबरले उनको परिवार अहिले स्तब्ध छ । २०६८ साल देखि विदेश आउजाउ गरेका कृष्ण डेढ/दुई बर्षको बिचमा छुट्टि मिलाएर नेपाल आईराख्ने गरेको भाई काजीले जानकारी दिए ।

करिब सात बर्ष अघि युनाईटेट प्यालेसमेन्ट नामक म्यानपावर मार्फत उनी साउदी अरबको एक होटलमा काम गर्नका लागि गएका थिए । ‘दाईको मृत्यु भएको पनि आज (बिहीबार) पाँच दिन बितिसक्यो’ काजी भन्छन् ‘शव नेपालमा कहिले आईपुग्ने हो थाहा छैन । अर्काको ठाउँमा पुगेर ज्यान गुमाउनु भयो । मर्ने बेला देख्न नपाएपनि अन्तिम संस्कार गर्नपाए उहाँको आत्माले शान्ति पाउँथ्यो ।’ कृष्णका श्रीमती, दुई छोरी र एक छोरा छन् । घटनाको बारे छोरीहरुलाई खबर भएपनि छोरालाई खबर गरिएको छैन । कृष्णका छोरा हालसालै नेपाली सेनामा भर्ति भएका छन् ।

कृष्णका भाई काजी र अन्य परिवारका सदस्यलाई उनको शव नेपाल कसरी ल्याउने भन्ने अर्काे पिरलो थपिएको छ । ‘शव कहिले आईपुग्ने हो थाहा छैन्’ विक्रम रानाले ‘सानो बुबा गुमाउनुको पिडा बोक्दै कहिले म्यानपावर जान्छु त कहिले परराष्ट्र मन्त्रालय । तर, जता गएपनि प्रोसेसिङ हुँदै छ भन्दै फर्काउछन् ।’

कृष्ण आफ्नो कम्पनीबाट साउदी गएको दुईबर्ष पछि कम्पनीको सम्पर्कबाट बाहिर रहेको युनाईटेट प्यालेसमेन्ट सर्भिसका डिकबिक खड्काले जानकारी दिए । ‘उहाँ २०६८ सालमा हाम्रो कम्पनीबाट साउदी जानु भएको हो’ खड्काले भने ‘बिदेश जानुभएको दुईबर्ष पछिबाट हाम्रो सम्पर्कमा आउनु भएको थिएन । उहाँको परिवारले घटनाको बारे जानकारी दिएपछि एम्बेसीमा सम्पर्क गरी उनको शव सक्दो छिटो नेपाल ल्याउने प्रयास गरिरहेका छौँ ।’ घटना कसरी भयो भन्ने बारे बिस्तृत जानकारी नआएको उनले बताए ।