पोखरा । पोखराका मुख्य सडकका छेउहरु फोहोरको थुप्रोले ढाकिन थालेपछि पोखरा ९ की राममाया मानन्धरलाई चित्त परेन । साँझसम्म सफा ठाउँमा बिहान उठ्दा फोहोर थुप्रिसकेको हुने । अनि सोचिन्, आफूले सक्दो किन नगर्ने ?

त्यसैले, फोहोर फाल्नेहरुमाथि निगरानी गर्ने मनसायका साथ बेलुकी घरको काम सकेपछि परिवार नै सडकमा निस्कन थाले । झण्डै तीन महिना हुन लाग्यो, राममाया श्रीमान् सन्तोष आले र छोरोका साथ सपरिवार नै राति अबेरसम्म पोखराको सडक निगरानी गर्दै हिँड्छिन् । छोरो बीचमा राखेर श्रीमानले चलाएको मोटरसाइकलमा बसेर पोखराका मुख्य मुख्य सडकमा फोहोर फाल्न नदिन यस्तो दैनिकी नै उनको बनेको छ ।

शान्तिबनबाटिका, पृथ्वीचोक, न्यूरोड, महेन्द्रपुल, पालिखेचोक, बास्तोलाथर, दरबारथोक मार्ग, नयाँबजार लगायतका ठाउँमा उनी डुल्छिन् । कतिलाई फोहोर फाल्दै गरेको अवस्थामा रंगेहात भेटिन्छ । उनीहरुलाई सम्झाईबुझाई गर्ने उनी बताउँछिन् । कति फेरि दोहोरिएर समातिन्छन्, उनीहरुलाई जरिवाना तिराउन समेत पछि नपर्ने राममाया सुनाउँछिन् ।

वडा नं. ९ बासीले जनप्रतिनिधिका रुपमा उनलाई वडा सदस्यमा चुनेको त्यसै होईनन् । सामाजिक गतिविधिमा उनी छुटेकी हुँदैनन् । शौभाग्य आमा समूहकी संस्थापक अध्यक्ष समेत रहेकी राममाया बृहत पोखरा सफाई अभियानकी अभियन्ता पनि हुन् । प्रमुख अभियन्ता रामबहादुर पौडेल सामाजिक काममा राममायाको सक्रियताको प्रशंसा गरेर कम हुने बताउँछन् ।

पोखरा वडा नं. ९ सचिव लोकदर्शन कोइरालाले सडकमा फोहोर फाल्नेहरुलाई मध्येरातसम्म खटिएर खबरदारी गर्ने राममाया स्वयंसेविकाका रुपमा वडाबासीलाई सेवा दिन हरदम तयार हुने बताउँछन् ।

अभियन्ता समेत रहेकी फिस्टेल नर्सिङ क्याम्पसकी प्रिन्सिपल जीता बराल पनि चौबिसै घण्टा निस्वार्थ सेवाका लागि खटिने राममाया जस्ता जनप्रतिनिधि देखेर आफू प्रभावित हुने बताउँछिन् ।

राममाया जस्तै, न्यूरोड क्षेत्रमा शिक्षिका एवं रेडियो गोर्खालीकी स्टेशन म्यानेजर खिमा गुरुङ यसरी नै पोखरा फोहोर बन्न नदिने अभियानमा जुटेकी छन् ।

पोखरा उपत्यका वृहत सफाई अभियानको १२३ औं श्रृंखला 

सफा पोखरा अभियानमा अभियन्ताहरु वर्षौंदेखि लागिरहेका छन् । हप्तामा एक घण्टा राष्ट्रका लागि स्वयंसेवा भन्ने मूल मन्त्रका साथ सुरु भएको पोखरा उपत्यका वृहत सफाई अभियानको १२३ औं श्रृंखला सम्पन्न भईसकेको छ । शनिबार पोखरा औद्योगिक क्षेत्रमा सरसफाई गरिएको छ । यो अभियान मुलुकमै निरन्तर र गर्वलायक अभियान बनेको छ ।

पछिल्लो दुई तस्विरः अभियन्ता अञ्जु क्षेत्री