पोखरा । पोखराकी योरुना पुन (नेहा) को बलात्कार प्रयासपछि हत्याको घटनाको फैसला हुन दुई वर्ष बढी लाग्यो । तर, उस्तै प्रकृतिको घटना श्रीया सुनार बिकको हत्या मुद्धाको फैसला कुर्न धेरै समय पर्खनुपरेन । नयाँ ऐन अनुसार हत्यारालाई आजिवन कैदको सजाय कास्की जिल्ला अदालतले सुनाएको छ ।

गत असोज ९ गते पोखरा – २२ पुम्दिभुम्दि, कोदीकी १० वर्षीया बालिका श्रीया सुनारको बलात्कार पछि हत्या गरेको आरोपमा पक्राउ परेका कुसुम पौडेललाई अदालतले जन्मकैदको फैसला सुनाएको छ । कास्की जिल्ला अदालतका न्यायधीश योगेन्द्र प्रसाद शाहको ईजालसले उनलाई जन्मकैदको सजाय सुनाएको हो ।

पोखरा महानगरपालिका २२ का मीनबहादुर विकको जाहेरीको आधारमा २७ बर्षिय पौडेललाई जन्मकैदको फैसला सुनाईएको अदालतले जनाएको छ । पौडेलमाथी भएको जन्मकैदको फैसला नेपालको ईतिहासमै पहिलो फैसला हो । मुलुकी अपराध संहिता २०७४ ले ६ किसिमको अपराधलाई जिवित रहँदासम्म कैदको व्यवस्था गरेको छ ।

जसमा बलत्कार पछिको हत्या पनि एक हो । मुलुकी अपराध संहिता ऐन २०७४ दफा ४१ (च) अनुसार कुसुमले जवर्जस्ती करणी गरी ज्यान मारेको ठहर भएकाले उनी अब जीवनभर जेल बस्नुपर्ने भएको छ । बलात्कारपछि हत्या गरेको आरोपमा २४ घण्टा नपुग्दै पक्राउ परेका कुसुमले अदालतमा आफूले बलात्कारपछि हत्या गरेको बयान दिएका थिए ।

जिल्ला न्यायाधिवक्ता गुरुप्रसाद वाग्ले,सहायक जिल्ला न्यायाधिवक्ता नवराज रेग्मी र पूर्णप्रसाद शर्माले पौडेलको विपक्षमा बादीको तर्फबाट बहस गरेका थिए । त्यस्तै, प्रतिबादीको तर्फबाट वैतनिक अधिवक्ता कृष्णकुमार श्रेष्ठले बहस गरेका थिए । दोषीउपर कडा सजायको माग गर्दै श्रीयाका आफन्तले एकसातासम्म आन्दोलन गरेका थिए । हत्या आरोपमा पौडेल गत असोज १० गते नै पक्राउ परेका थिए ।

सम्बन्धित समाचार:

श्रीयाको बलात्कार गरी हत्या गर्ने छिमेकी कुशुम पौडेल पक्राउ

नेहा हत्या प्रकरण: यौन प्रस्ताव अस्विकार गरेपछि हत्या, अभियुक्त सतिशसँग सम्बन्ध