पोखरा । पोखराको प्रत्येक बजेट भाषण र हाकिम फेरिएसँगै जोडिने ट्राफिक लाइट जडानको विषय अहिले फेरि अगाडि बढेको छ । सडक डिभिजन कार्यालय र पोखरा महानगरपालिकाको समन्वयमा पोखराका १० ठाउँमा ट्राफिक लाइट राख्न सर्भे सुरु भएको छ ।

सडक डिभिजन कार्यालयले, अमरसिंह, पृथ्वीचोक, जिरो किलोमिटर, बिरौटा चोक र सिर्जना चोकमा २४ सै घन्टा ट्राफिक लाइट चलाउने गरी सर्भे गरिरहेको छ । मुख्य चोकमा क्यामरा जडान गरी सर्भेको काम भइरहेको सडक डिभिजन प्रमुख हरिकुमार पोखरेलले जानकारी दिए । सभागृह, सिर्जनाचोक, महेन्द्रपुल, चिप्लेढुंगा चोकमा रहेका ट्राफिक लाइट लोकतान्त्रिक आन्दोलनताका भाँचिएका थिए ।

सडक डिभिजन कार्यालयबाट सर्भे गरिरहेको टोलीलाई पोखरा महानगरपालिकाले पनि समन्वय गरी सर्भेको काम अगाडि बढाइरहेको छ । मुख्य राजमार्गसँग जोडिएका चोकमा सडक डिभिजन र अन्य चोकमा महानगरले ट्राफिक लाइट जडान गर्ने योजना रहेको छ ।

महानगरपालिकाले चिप्लेढुंगा चोक, महेन्द्रपुल, सभागृह चोक, राष्ट्रबैंक चोक र हलनचोकमा ट्राफिक लाइट जडान गर्ने योजनासहित सर्भे अगाडि बढाएको मेयर मानबहादुर जिसीले जानकारी दिए । पोखरा महानगरले यस्ता विभिन्न पूर्वाधार निर्माणका लागि १ करोड रुपैयाँ बजेट विनियोजन गरेको छ । सर्भेपछि डीपीआरसहित रिपोर्ट आउने र त्यसपछि ट्राफिक लाइट जडानको काम अघि बढ्ने मेयर जीसीको भनाइ छ ।