ललितपुर नख्खुस्थित एनसेल कार्यालयको गेट अगाडि शुक्रबार राति बम विस्फोटको घटना लगत्तै पोखराको एनसेल टावरमा पनि आगजनी गरिएको छ । पोखरा २७ चन्द्रकालिका डाँडाको नाकस्थित एनसेलको टावरमा आगजनी हुँदा टावरमा पूर्ण क्षति पूगेको प्रहरीले जनाएको छ ।

शुक्रबार राति करीब १० बजेको समयमा आगजनी गरिएको कास्की प्रहरीले जनाएको छ । टावरमा आगजनी भएपछि दमकल बोलाइएको र दमकल नपुग्दै टावर कामै नलाग्ने गरी ध्वस्त भएको बताईन्छ । एनसेलको टावर जलेसँगै लेखनाथ क्षेत्रमा विद्युत र इन्टरनेटको लाइन काटिएको स्थानीयले जनाएको छ । अरबौं कर तिर्न बाँकी एनसेललाई सर्वोच्च अदालतले कर बुझाउन ताकेता गरिसकेको छ ।

आजै ललितपुर नख्खुस्थित एनसेल कार्यालयको गेट अगाडि बम विस्फोटबाट दुई महिला र एक पुरुष घाइते भएका थिए । घाइते हुनेहरुमा सिंहप्रताप गुरुङ, प्रतिक्षा खड्का र अनुषा डंगोल छन् । घाइते मध्ये गुरुङको अवस्था गम्भीर छ । उनको अल्का अस्पतालमा उपचार भइरहेको प्रहरी स्रोतको भनाइ छ ।

अन्य दुई जनाको बीएन्डबी र मेडिसिटी अस्पतालमा उपचार भइरहेको छ । शुक्रबार करिब साढे आठ बजे विस्फोट भएको हो। प्रहरीले नेत्रविक्रम चन्द नेतृत्वको नेकपाले चन्दा नदिएको भन्दै बम विस्फोट गराएको आशंका गरेको छ। ’विप्लव समूहले एनसेल प्रालिमा एक महिना अगाडि पत्र पठाएर चन्दा मागेको थियो, ’एसएसपी रविन्द्रबहादुर धानुकले भने ’त्यही पत्रबारे अस्ति ८ गते राजन तिमिल्सिना नेतृत्वमा ३ जना एनसेल कार्यालय पुगेका थिए। सुनुवाइ नभएपछि यो घटना गराइएको हुनसक्छ।’

एनसेलले कर नबुझाएपछि विप्लव माओवादीले यहाँ पनि आगजनी गरेको हुन सक्ने आशंका गरिएको छ ।