पोखरा । होली खेल्ने क्रममा बुधबार अनुचित व्यवहार गरी कुटपिटमा समेत संलग्न भएका एक सय एक जनालाई कास्की प्रहरीले पक्राउ गरेको छ । होलीका क्रममा अनावश्यक हो—हल्ला गरी झै—झगडा गर्ने २ महिला सहित १ सय १ जना पोखराको बिभिन्न क्षेत्रबाट पक्राउ परेका हुन् ।

जिल्ला प्रहरी कार्यालय कास्कीको अनुसार बुधबार पक्राउ परेका मध्ये ४२ जनालाई अनुसन्धान पछि आफन्तको जिम्मामा छाडिएको छ भने बाँकी ५९ जनालाई अनुसन्धान गरिरहेको छ ।

पोखरामा ट्राफिक नियम उल्लङ्घन गर्ने ५०  बढि सवारी कारवाहीमा

होलीमा हुन सक्ने सम्भावित सवारी दुर्घटना न्यूनिकरणका लागि खटिएका ट्राफिक प्रहरी कास्कीको टोलीले ५० जना भन्दा बढी सवारीलाई कारवाही गरेको जनाएको छ । बुधबार परेको होली पर्वको अवसरमा ट्राफिक चेकिङ तीब्र बनाएसँगै नियम उल्लङ्घन गर्ने ५० जना भन्दा बढी सवारी चालक कारवाहीमा परेका हुन् । बुधबार कास्की प्रहरीले सिभिल मोवाईल सहितका ६ सय भन्दा बढी सुरक्षाकर्मी विभिन्न स्थानमा खटाएको जनाएको छ ।

काठमाण्डौ उपत्यकाभित्र ९१८ सवारी चालक कारवाहीमा

तर, काठमाण्डौ उपत्यकाभित्र ट्राफिक प्रहरीले होली पर्वमा जथाभावी रुपमा सवारी साधन चलाउने ९१८ चालकलाई कारवाही गरेको छ । महानगरीय ट्राफिक प्रहरी महाशाखाले आज होली पर्वका अवसरमा ट्राफिक नियम उल्लङ्घन गर्ने ९०५ दुईपाङ्ग्रे र १३ वटा चारपाङ्ग्रे सवारी साधनलाई कारवाही गरेको हो ।

महाशाखाका प्रमुख एवं प्रहरी वरिष्ठ उपरीक्षक वसन्तकुमार पन्तले मादक पदार्थ सेवन गरी सवारी चलाउने, मोटरसाइकलमा तीन जना राखेर चलाउने, तीव्र गतिमा चलाउने र ठूलो आवाज निकालेर चलाउने चालकलाई कारवाही गरिएको जानकारी दिएका छन् ।

अवाञ्छित गतिविधि गर्ने ८४ जना पक्राउ

होलीको अवसरमा उच्छृङ्खल गतिविधि गर्ने ८४ जनालाई आज प्रहरीले नियन्त्रणमा लिएको छ । उनीहरुलाई उपत्यकाका विभिन्न क्षेत्रबाट पक्राउ गरिएको हो ।