सिरहामा एक युवतीमाथि मट्टितेल छर्किएर जिउँदै जलाएर हत्या गर्ने प्रयास भएको छ । सिरहा नगरपालिका–८ की २१ वर्षीय कन्चन मण्डललाई बिहीबार पति र सासु मिलेर जिउँदै जलाएर हत्या गर्ने प्रयास गरेका हुन् ।

कन्चनको शरीरको ५० प्रतिशत माग जलेको बताइएको छ। जलिरहेको अवस्थामा देखेपछि उनलाई छिमेकीहरुले धरानस्थित बिपी स्वास्थ्य विज्ञान प्रतिष्ठान लगिएको थियो । तर, अस्पतालले उपचार सम्भव नभएको जनाएपछि राति पौने २ बजे उनलाई काठमाडौं ल्याइएको एक छिमकीले बताए ।

कन्चनको अहिले किर्तिपुर अस्पतालमा उपचार भइरहेको उनलाई सिरहादेखि काठमाडौं ल्याउन सहयोग र्पुयाउने जिता गुरुङले जानकारी दिइन् । श्रीमतीलाई जिउँदै जलाउन खोज्ने पति बेचन मण्डल फरार छन् भने कन्चनकी सासुलाई भने सिरहा प्रहरीले नियन्त्रणमा लिएको छ ।

यसअघि गएको बैशाख ५ गते धनुषाको शहिदनगर नगरपालिका–१, पुरवारी टोल चिरैयाकी २० वर्षीया नवविवाहिता निर्मला यादवलाई पति मुकेश यादव गोइतले शरीरमा मट्टितेल खन्याएर आगो लगाएका थिए ।तराई क्षेत्रमा दाइजो नल्याएको तथा कम ल्याएको भन्दै महिलामाथि गम्भीर प्रकृतिका हिंसा हुने गरेका छन् ।

nepallive.com