सुर्खेत । कर्णाली प्रदेश सरकारले बुधबार दुई जना सुत्केरी महिलाको उद्धार गरेको छ । हुम्लाको चंखेली गाउँपालिका र अदानचुली गाउँपालिका १ बाट सुत्केरी महिलालाई उद्धार गरेको हो । चंखेली गाउँपालिकाको मेल्छम स्वास्थ्य चौकीमा कार्यरत अनमी दाङकी निशा नेपाली र अदानचुली गाउँपालिका–१, की राजकला महतारालाई सामाजिक विकास मन्त्रालयले उद्धार गरेको हो ।

गर्भपतन गराउँदा अत्याधिक रक्तश्राव भएकोले उनलाई हेलिकप्टरमार्फत प्रदेश अस्पताल कालागाउँमा र्पुयाइएको हो । अहिले उनको उपचार भइरहेको अस्पताल स्रोतले जनाएको छ । राजकला महताराका दुई छोरा एक छोरी छन् । उनलाई हिजो साँझ सुत्केरी व्यथा लागेको थियो ।

तर उनको ’सालनाल’ पहिले खसेका कारण उनले बच्चा जन्माउन सकिनन् । त्यो खबर सामाजिक विकास मन्त्री दल रावलकहाँ आइपुग्यो । तत्काल उनले आफू गएर हेलिकप्टर मार्फत उद्धार गर्न लगाए । अहिले उनको उपचार पनि प्रदेश अस्पतालमा भइरहेको छ ।

‘सरकार ! मेरा लागि भगवान नै तपाईं नै हो,’ सुर्खेत विमानस्थलमा श्रीमती ल्याइसकेपछि राजकलाका श्रीमान वृष महताराले भने, ‘सरकार धन्य छ । सबै जनाले मेरो श्रीमतीको जस्तै तत्काल सेवा पाउन् ।’ उनले अब श्रीमतीलाई केही नहुने विश्वास समेत गरे ।

यी त प्रतिनिधिमुलक घटना मात्र हुन् । कर्णालीका विकट जिल्लामा स्तरीय स्वास्थ्य संस्था नभएका कारण सुत्केरी महिलाको ज्यानको खतरा सधैं हुने गरेको मन्त्री दल रावलले बताए ।