तनहुँ । लोप हुँदै गएको सिप्लिगानको बीउ उत्पादन गर्ने उद्देश्यसहित तनहुँको म्याग्दे गाउँपालिका–२ स्थित ज्यानटाङ सामुदायिक वनमा सिप्लिगानको स्रोतकेन्द्र निर्माण गरिने भएको छ । डिभिजन वन कार्यालयले सामुदायिक वनको तीन हेक्टर क्षेत्रफलमा सिप्लिगानको स्रोतकेन्द्र बनाउन लागेको हो ।

स्रोतकेन्द्र बनाउन सामुदायिक वनको नाङ्गेडाँडामा विश्व वातावरण दिवसका अवसरमा बुधवार सिप्लिगानका बिरुवा रोपण गरिएको छ । डिभिजन वन कार्यालयका प्रमुख केदार बराल, सहायक वन अधिकृत बाबुराम उप्रेती, मनोज रानाभाट, वन समूहका अध्यक्ष ईश्वरबहादुर रानाभाटलगायत उपभोक्ताले सिप्लिगानको बिरुवा रोपेका छन् ।

स्रोतकेन्द्र स्थापनाका लागि कार्यालयले चार लाख लगानी गरेको बरालले जानकारी दिए । उनका अनुसार कार्यालयको आर्थिक, प्राविधिक सहयोग र उपभोक्ताको सहभागितामा सिप्लिगानको स्रोतकेन्द्र निर्माण हुनेछ । स्रोत केन्द्र निर्माणका लागि नाङ्गेडाँडामा पाँच हजार सिप्लिगानका बिरुवा रोपण गरिनेछ ।

‘लोप हुँदै गएको सिप्लिगानको संरक्षण गर्दै बीउ उत्पादन गर्ने उद्देश्यसहित स्रोतकेन्द्र स्थापना गर्न लागेका हौं,’ प्रमुख बरालले भने, ‘मध्य पहाडी भागमा पाइने सिप्लिगानको बजारमा निकै ठूलो माग छ ।’ बरालका अनुसार सिप्लिगान औषधीय गुण भएको मध्यम आकारको रुख वर्गमा पर्ने वनस्पति हो । उनका अनुसार सिप्लिगानलाई उच्च रक्तचाप, चिनीरोग, पिसाबसम्बन्धीलगायत रोगको औषधिका रुपमा प्रयोग गर्न सकिन्छ ।