पोखरा । नेपाल युवा परिषदको आयोजानामा पोखरामा पहिलोपटक आज (शुक्रबार) प्रदेश युवा सम्मेलन सुरु हुँदैछ । गण्डकी प्रदेशमै पहिलो पटक हुन लागेको यो सम्मेलनमा १८ देखि ३० वर्ष उमेर समूहका करिब २ सय युवाको सहभागिता रहने नेपाल युथ काउन्सिल गण्डकी प्रदेश संयोजक मोनिका रानाभाटले जानकारी दिईन् ।

शनिबारसम्म चल्ने सम्मेलनमा गण्डकी प्रदेशका ११ वटै जिल्लाका युवाहरुको उपस्थित रहनेछ । आयोजकका अनुसार सम्मेलनमा युवा उद्यमशिलता,जलवायु परिबर्तन, युवा र राजनीति, युवा र दिगो बिकासका लक्ष्यहरु, युथ एक्सचेन्जलगायतका विषयमा छलफल तथा अन्तरक्रिया हुनेछ ।

साथै उक्त कार्यक्रममा प्रदेश नम्बर १ का करिब २ दर्जन युवा सहभागी हुने छन् । पोखरा फेवा मार्गस्थित शान्तिनगर बैंक्युटमा आज बिहान १० बजे सुरु हुने कार्यक्रममा भिजिट नेपाल २०२० लाई प्रबर्धन गर्ने गरि युवा र पर्यटन बिषयमा समेत छलफल हुने छ ।

सम्मेलनमा प्रत्येक जिल्लाबाट सहभागिता जनाउने युवाहरुले आआफ्नो जिल्लाका बारेमा सबैलाई जानकारी दिने कार्ययोजना सहितको प्रस्तुत गर्नेछन् ।  कार्यक्रमको पहिलो दिन आज सांस्कृतिक साझ पनि आयोजना गरिएको छ जहाँ सहभागीहरुले प्रस्तुति पनि दिनेछन् ।

सम्मेलनमा सामाजिक विकास मन्त्रालय,उद्योग वन तथा वातावरण मन्त्रालय लगायत अन्य संघ संस्थाको समेत सहकार्य रहेको छ । हाल सम्म ५२ वटा जिल्ला र सातै वटा प्रदेशमा आफ्नो सक्रिय उपस्थिति देखाइसकेको यो संस्थाले युवाहरुमा नेतृत्वदायी भूमिका बिकास गर्दै सामाजिक परिबर्तनमा युवा अग्रसरतालाई जोड दिंदै आएको छ ।

नेपालको कुल जनसख्याको ४० प्रतिशत हिंसा ओगटेको युवा जमातले नेतृत्वदायि भुमिकामा आउन आवश्यक देखिन्छ, तब मात्र केहि परिवर्तन आउन सक्छ ।

युवा परिवर्तको सम्वाहक हो भन्ने नाराका साथ काम गदै आईरहेको नेपाल युवा परिषदले यस बर्ष नेपालका ७  ओटै प्रदेशमा प्रदेश युवा सम्मेलन गर्ने जर्मर्को गरिरहेको प्रदेश संयोजक रानाभाटले जानकारी दिइन ।

यो भन्दा पहिला गएको वर्ष गण्डकी प्रदेशमा युएनडिपि नेपालको सहकार्यमा एसडिजि फेस्टिभल आयोजना गरी दिगो विकास लक्ष्य प्राप्ति गर्न र दिगो विकास लक्ष्यलाई स्थानियकरण गर्न नेपाल युवा परिषदले कार्य गदै आईरहेको छ ।