संघीय मामिला तथा सामान्य प्रशासन मन्त्री लालबाबु पण्डितले कर्मचारीहरूलाई संघबाट प्रदेश स्थानियमा जान नडराउन आग्रह गरेका छन् ।

बाग्लुङका कर्मचारीहरूलाई निर्देशन दिँदै उनले वृत्ति विकास, सेवा सुविधामा कुनै कमी नहुने भएकाले कार्यक्षेत्रमा खटिएर काम गर्न निर्देशन दिए । संघीय कानुन कार्यान्वयनका बेला यो विरोध र असन्तुष्टी स्वभाविक रहेको उनको भनाई छ । मौसम परिवर्तनका बेला रूघा खोकी लाग्नु सामान्य भन्दै उनले कर्मचारीमा अहिले गुनासो हुनु अपेक्षित नै रहेको बताए ।

कर्मचारीलाई निर्देशन दिँदै उनले भने-‘संघीय कार्यालयमा रहँदा सरकारी, प्रदेश कार्यालयमा अलिअलि सरकारी र स्थानिय तहमा सरकारी नै नसोच्ने मानसिकता हटाउनुपर्छ । सरकारी साधनहरूको प्रयोग उचित हिसाबले गरौं । कार्य सम्पादन सम्झौता हुन्छ । उल्लेखित कुरा पूरा भएन, अनुशासन, जिम्मेवारीबोध भएन, खराब आचरण भए मन्त्रालयका सचिव पनि बर्खास्त हुन्छन् । अब बढुवाका लागि विकटमा ३ वर्ष, सुगममा त्यही काम गरेवापत १० वर्ष लाग्छ । सबैको काठमाण्डौंमै बसम् भन्ने सोचलाई अब यसरी हटाउँछौं । ड्युटी आवरमा कुनै निजी काम गर्न पाईनेछैन । ट्रेड युनियन अब कार्यालय समयमा हुँदैन । कार्यालय समय पश्चात् स्वतन्त्र छ । ट्रेड युनियन सेवा हैन । पेशा हैन ।

पेशा राष्ट्रसेवक, सेवा निजामति हो । ट्रेड युनियनको भूमिका सरूवा बढुवाको फाइल बोक्ने हैन । हड्ताल गर्न कुनै छुट छैन । सामूहिक राजिनामा स्वीकृत हुन्छ । अनावश्यक दबाब सुन्न तयार छैनौं । ५८ वर्षे उमेरहद बढ्छ । कामै गर्न नसक्नेलाई अवकाश दिइनेछ । नक्कली रोगीलाई कुनै छुट छैन । महिलाहरूलाई विशेष प्राथमिकता छ तर नेतालाई हुन्न । अनुशाषनहीनलाई दण्ड दिनेछौं ।

अब नेपाल विकशीत देशसँग प्रतिष्पर्धा गर्नुछ ।’ दबाब, प्रभाव, भनसुन, चाकडी, कोशेलीभेटी अब चल्दैन ।

मन्त्री पण्डितले अघि थपे -संघीय निजामति सेवा एेन, प्रदेश निजामति सेवा एेन, स्थानिय सेवा एेनमा अब आफ्नो अनुहार देख्नुहुनेछ । पिपलपात हल्लिएजस्तो सरकार हल्लिदैँन । अब हल्लाउँछु, ढल्लाउँछु भन्ने दिन गए । टाउको नदुखाउनुहोस्, काम पूरा गर्नुहोस् । रिटायर्डहरू डिभि पिआर लिएर गए पेन्सन पाउन्न । अख्तियारमा थुन्ने ठाउँ छैन, नयाँ ठाउँ खोजेर भएपनि भ्रष्टहरूलाई कोच्नुपर्छ । अनि बल्ल कोहि माथिबाट हाम्फाल्छ, कोहि डोरी समात्न पुग्छ । आफ्नो अपराध अर्को पुस्ताले भोग्छ । हात थाप्ने, युवा विदेश पठाउने, अनि देश बन्छ ?’

यसअघि, पर्वतका पत्रकारहरूमाझ उनले संघीय निजामति सेवा एेन अन्तिम चरणमा रहेको र यही हप्ता सदनले पारित गर्ने सम्भावना रहेको समेत बताए ।

यस्तै, बागलुङमा आयोजित पत्रकार सम्मेलनमा संघीय व्यवस्था लागू भएपछि नेपालमा जति छिटो कुनै पनि मुलुकले समायोजन प्रक्रिया नसकेको बताए । दक्षिण अफ्रिका र भारतको उदाहरण दिँदै मन्त्री पण्डितले आफूले १ वर्षमै गरेको कामलाई विदेशीहरूले समेत प्रशंसा गरेको बताए । यो समय नै संघीय कानुन कार्यान्वयनको बेला रहेकोले सबै काम आफ्नो मन्त्रालय मातहत रहेको र काम यति छिटो गतिमा अघि बढ्दा पनि लालबाबुले पहिले जस्तो काम गर्न भनेर आलोचना गर्नु बुझाईको कमी भएको उनको भनाई छ ।