पोखरा । कास्की प्रहरीले अपहरणको झुटो नाटक गर्ने एक पुरुषलाई पक्राउ गरेको छ । आफू अपहरणमा परेको झुटो नाटक गर्ने पोखरा ११ फुलबारी बस्ने ४२ वर्षीय नारायण प्रसाद पौडेललाई प्रहरीले मङ्गलबार पक्राउ गरेको हो ।

पक्राउ परेका पौडेलले गत शनिबार दिउँसो साढे १ बजे आफू अपहरणमा परेको जानकारी प्रहरीलाई दिएका थिए । उनले अपहरणकारीले रुपन्देही लगी छाडेर भारत तर्फ बोलाएको भनि रुपन्देहीमा आइतबार उजुरी दिएका थिए । उनको उजुरी पश्चात् प्रहरीले आफन्तकोमा फर्र्काएको थियो ।

अनुसन्धानका क्रममा उनी आफैँ रुपन्देही गएको र त्यहाँ गएर उजुरी दिएको खुल्न आएको जिल्ला प्रहरी कार्यालय कास्कीका डिएसपि राजकुमार केसीले जानकारी दिए । लेनदेनको विषयबाट छुटकारा पाउन पौडेलले आफ्नै अपहरणको नाटक गरेको केसीले बताए ।

‘आफुले आर्थिक हिसाब दिन बाँकी रहेका मानिसलाई फसाउनका लागि अपहरणको नाटक गरेको खुल्न आएको छ ।’ डिएसपि केसीले भने । प्रहरीले अहिले यस बारे थप अनुसन्धान गरिरहेको छ ।

गत भदौ २५ गते बिहिबार पनि कास्की प्रहरीले निर्माण व्यवसायी रत्नबहादुर कार्की ‘जीवन’ को अपहरण गरेको आरोपमा एक गिरोह पक्राउ गरेको थियो । साथै आफ्नै श्रीमान्को अपहरणको प्रयास गरेको आरोपमा श्रीमति र एक पुरुषलाई पनि प्रहरीले पक्राउ गरेको थियो ।