काठमाण्डौ-पोखरा-काठमाण्डौ उडान भर्ने श्री एयरलाइन्सले सस्तो भाडादर कायम गरेको निकै प्रचार भयो । सबै औधी खुशी पनि भए । सोहि भाडादर बुद्ध एयरलाइन्स लगायतले पनि कायम गरेको इ-टिकट काट्नेहरुले देखे । तर, श्रीले सधैं यही दरमा यात्रु नउडाउने स्पष्ट सन्देश दिएको छ ।

विदेशी पर्यटकलाई डलर फेयर भने हाललाई सस्तो बनाएको छ । पोखरामा प्रवेशसँगै श्रीले ८४ डलर मै विदेशीहरुलाई सेवा दिन थालेको छ । नेपालीहरुलाई भने २ हजार रुपैयाँमै काठमाण्डौ पोखरा उडान गरिरहेको छ । पोखरा काठमाण्डौको २६ सय लिएको छ ।

शुक्रबारबाट सेवा सुरु गरिएको छ । यी त नयूनतम मूल्य मात्रै भएको एयरलाइन्सले स्पष्ट पारेको छ । विदेशीहरुको लागि १ सय १० हुँदै १ सय २३ डलरमा उडान गर्ने र नेपालीलाई ३ हजार ७ सय,४ हजार २ सय र ५ हजारसम्म भाडादर निर्धारण गरिएको प्रवन्धक अनिल मानन्धरले जानकारी दिए । सिजन अनुसार भाडादरमा केहि तल माथि हुने उनको भनाइ छ ।

यसो भएमा यो केही समयको विजनेश फण्डा मात्रै हुनेछ । श्री एयरलाइन्सले शुक्रबारबाट पर्यटकीय नगरी पोखरामा नियमित उडान सुरु गरेको हो । ८० सिट क्षमता भएको क्यू ४०० जहाज मार्फत श्रीले दैनिक २ उडान गरिरहेको छ । आवश्यक परे ५ उडान समेत गर्न सक्ने जनाइएको छ । श्रीको जहाज ठूलो र उचाईबाट उड्ने भएकाले २० मिनेटमा गन्तव्यमा पुग्न सकिन्छ ।