पोखरामा गत साउन २७ गते एकै दिन १५ जनामा कोरोना पुष्टि भयो । त्यसअघि, १५ साउनमा १४ जनामा देखियो । आज शनिबार मात्रै १२ जना संक्रमित थपिएका छन् । पोखरा महानगरकै एक जनाको मृत्यु भइसकेको छ । पोखरा १९ लामाचौरका ६२ वर्षीय पुरुषको गत हप्ता शनिबार राति मृत्यु भयो ।

ट्राभल हिस्ट्री नभएका तर संक्रमित बनेका केही केसहरुले पोखरामा समुदाय स्तरमै कोरोना संक्रमण फैलिएको पुष्टि गर्छ । पोखरा महानगरपालिकाका मेयर मानबहादुर जिसी स्वयं कोरोना समुदाय स्तरमै फैलिसकेको स्विकार्छन् । तर, प्रभावकारी कदम कसरी चाल्ने, कहिले चाल्ने ? अत्तोपत्तो छैन । दिनदिनै संक्रमितको संख्या बढेको बढ्यै छ । पोखरामा बस्नेहरुलाई मतलबै नभएजस्तो देखिन्छ । बजारमा भिडभाड कोरोना भाइरस आउनु अघि जस्तै छ । पहिले त नागरिक आफै जागरुक र सतर्क हुनुपर्छ ।

गण्डकीका मुख्यमन्त्री पृथ्वीसुब्बा गुरुङ सार्वजनिक कार्यक्रमहरुमा अब लकडाउन हुँदैन भन्दै अभिव्यक्ति दिँदै आएका छन् । नागरिकले सतर्कता नअपनाउने, प्रशासन र सरकार यसरी खुलमखुल्ला छाड्ने हो भने स्थिति नियन्त्रण नै गर्न नसक्ने गरी भयावह हुनेमा कुनै शंका छैन ।

यस्तो लापरबाहीले संक्रमितको संख्या उच्च हुँदा उपचार पनि नपाउने अवस्था निश्चित छ । गण्डकी अस्पतालमा बनेको आइसोलेसन भरिभराउ भएर लेखनाथ तिर समेत सारिएको अवस्था छ । त्यहाँको हालत उस्तै दयनीय छ ।

लकडाउन पछि खुल्ला भएको चितवनको भरतपुर, रुपन्देहीको बुटवल शहरहरु लकडाउनमा छन् । पोखरामा भने सबै बिन्दास पारामा छन् । न प्रदेश सरकार गम्भिर छ, न स्थानिय सरकार गम्भिर छ, न पोखराबासी नै गम्भिर छन् । मरेपछि समेत परिवारले छुन पाउँदैनन् । बाँच्दा समेत कसैले छुँदैनन् । आफूले कोरोनालाई जित्न सक्ने आँट भएपछि घरमा बृद्धबृद्धा बुबाआमा र साना छोराछोरी छन् भन्ने हेक्का कसैलाई नभएजस्तो बजारको भिडले देखाउँछ ।

पोखरा-१ मा सामाजिक दुरी कायम नगरी तरकारी किन्नेको भिड

भरतपुर महानगरमा एकसाता लकडाउन

चितवनका स्थानीय तहहरुले कोरोना भाइरसको संक्रमण समुदायमा फैलिन थालेको भन्दै धमाधम सिल गर्न थालेका छन् । जिल्लाको एक मात्रै गाउँपालिका इच्छाकामनाले ७८ वर्षीया वृद्धामा कोरोना भाइरसको संक्रमण पुष्टि भएपछि बुधबारबाट एकसाताका लागि गाउँपालिका नै सिल गरेको छ ।

यस्तै, भरतपुर महानगरपालिकाले शुक्रबार राति १२ बजेबाट लागु हुने गरी एकसाता लकडाउन गर्ने गरिसकेको भरतपुर महानगरपालिका प्रमुख रेणु दाहालले जनाएकी छन् । महानगरपालिका क्षेत्रभित्र कोरोना संक्रमण फैलिन थालेकोले एक साताका लागि लकडाउन गर्ने निर्णय गरेको हो । भरतपुरमा बिहीबार मात्रै ९ जना संक्रमित थपिएका थिए ।

सुनसान छ बुटवल

बुटवल उपमहानगर क्षेत्रभित्र बिहीबार रातिदेखि लकडाउन भएपछि बुटवल क्षेत्र पनि सुनसान छ । बुटवलमा समुदायस्तरमा कोरोना भाइरसको संक्रमण उच्च देखिएपछि बुटवल उपमहानगरको बैठकले भदौ ५ गतेसम्म पूर्ण लकडाउन गर्ने निर्णय हो । सार्वजनिक र निजी सवारी पनि बन्द गरिएको छ।

बुटवल भएर पूर्वपश्चिम राजमार्ग र सिद्धार्थ राजमार्गमा चल्ने गाडीले बुटवलमा रोक्न, सवारी ओराल्न र चढाउन पाउने छैनन्। तरकारी बोक्ने गाडीहरु पनि परिचय पत्र बोकेर मात्रै सञ्चालन गर्न पाइनेछ। होटल तथा रेष्टुरेन्टहरु पनि बन्द गर्न नगरपालिकाले निर्देशन दिएको छ।