पोखरामा विहीबार भेटिएका तीन जनामध्ये दुई जना कोरोना संक्रमित पोखरा ५ का हुन् । उनीहरु पोखरा मालेपाटन स्थित एक सहकारीमा कार्यरत कर्मचारीका नातेदार भएको खुलेको छ । ति कर्मचारीको परिवारमा १३ जनामा संक्रमण पुष्टि भइसकेको छ ।

साउन २७ गते कञ्चन सहकारीमा पैसा संकलनको काम गर्ने ति ३८ वर्षीया महिला र उनका ११ वर्षीय छोरामा कोरोना पुष्टि भएको थियो । त्यसपछि कन्ट्याक्ट ट्रेसिङका क्रममा उनका परिवारको पनि स्वाब परीक्षण गरिएको थियो ।

वडाअध्यक्ष धनबहादुर नेपालीका अनुसार परीक्षण गर्दा ५ दाजुभाइ रहेका उनको जेठो दाजुको परिवारका ६ जना, माइलो दाजुको परिवारका ४ जना र साइँलो दाजुका ३ जना परिवारमा कोरोना देखिएको छ । विहीबार देखिएका दुई जना १४ वर्षीय पुरुष र १६ वर्षीया महिला माइला दाजुका छोराछोरी हुन् ।

ति महिला ज्वरो आएपछि साउन २२ गते फेवासिटी अस्पतालमा भर्ना भएकोमा साउन २५ गते शंका लागेपछि स्वाब परिक्षणका लागि पठाइएको थियो । दुई दिनपछि स्वाबको रिपोर्ट पोजेटिभ आएको थियो।

पोखरा महानगरमा अहिलेसम्म कोरोना संक्रमितको संख्या २ सय ४२ पुगेको छ। जसमा १ सय ३१ जना निको भएर घर फर्किसकेका छन्। पोखरामा मृत्यु हुनेको संख्या भने २ पुगेको छ ।