पोखरा – कास्की प्रहरीले लागु औषध सहित दुई व्यक्तिलाई पक्राउ गरेको छ ।

पक्राउ पर्नेमा पोखरा महानगरपालिका वडा नं -२७ ज्यामिरेकुना घर भै हाल अर्घौचोक बस्ने वर्ष २३ का सन्दिप विक र पोखरा -२७ कालिगण्डकी बस्ने वर्ष २९ का किशोर तिमिल्सिना रहेको कास्कीका प्रहरी नायव उपरीक्षक तथा प्रहरी प्रवक्ता सुवास हमालले जानकारी दिए ।

हमालका अनुसार पोखराको बिभिन्न स्थानमा लागु औषध गाँजाको बिक्री वितरण तथा ओसारपसार हुने गरेको भन्ने गोप्य सुचनाका आधारमा भाद्र ४ गते बिहिबार अन्दाजी ५ बजेको समयमा ईलाका प्रहरी कार्यालय हंशपुरबाट खटिएको प्रहरीको टोलीले गरेको चेकजांचका क्रममा  ग ५ प ५८७९ नम्वरको मोटरसाइकलबाट २० ग्राम गाँजा सहित उनीहरुलाई पक्राउ गरेको हो । उनीहरु दुबै माटोको ठेक्का सम्बन्धी काम गर्ने बुझिएको छ ।

पक्राउ परेका उनीहरु माथि थप सोधपुछका क्रममा घरको कोठामा समेत गाँजा राखेको बताएपछि प्रहरीले उनीहरुको कोठामा खान तलासी गर्दा सन्दिप विकको कोठाबाट १ किलो ४४० ग्राम गाँजा वरामद गरेको थियो । साथै, प्रहरीले उनीहरुको साथबाट २ थान मोवाइल सहित प्रयोग गर्दै आएको उक्त VR मोटरसाइकल समेत नियन्त्रमा लिएको छ ।

पक्राउ परेका उनीहरु माथि लागु औषध नियन्त्रण ऐन २०३३ विपरितको कसुर अन्तर्गत मुद्दा दर्ता गरी कास्की जिल्ला अदालतबाट १७ दिनको म्याद थप गरि आवश्यक अनुसन्धान अगाडि बढाइएको प्रवक्ता हमालले जानकारी दिए ।