तनहुँ । जिल्ला प्रहरी कार्यालय तनहुँले बहुविवाह मुद्दाका फरार व्यक्तिलाई ९ वर्षपछि पक्राउ गरेको छ ।

प्रहरीले उक्त मुद्दामा भिमाद नगरपालिका-२ स्थायी घर भई हाल व्यास नगरपालिका-५ बस्ने बर्ष ३२ की हरीमाया नेपालीलाई पक्राउ गरेको हो ।

पक्राउ परेकी नेपाली उपर तनहुँ जिल्ला अदालतको २०६८ असार २८ गतेको फैसलाले १ वर्ष ६ महिना कैद र १५ हजार रुपैयाँ जरिवाना गरी सजाय सुनाएकोमा उक्त फैसला पश्चात उक्त कैद तथा जरिवाना भुक्तान गर्न बाँकी रही हालसम्म फरार रहेकी र निजको खोजतलास गर्ने क्रममा उनलाई गत बिहीबार दिउँसो उनकै घर वतनमा लुकिछिपी बसेको अवस्थामा पक्राउ गरिएको तनहुँका प्रहरी नायव उपरीक्षक युवराज तिमिल्सिनाले जानकारी दिए ।

नेपालीलाई कानूनी रितपुर्वक पक्राउ गरी तनहुँ जिल्ला अदालत समक्ष पेश गरेकोमा बाँकी रहेको कैद भुक्तानको लागी कारागार कार्यालय कास्की पठाएको तनहुँ प्रहरीले जनाएको छ ।

तनहुँ प्रहरीले विभिन्न अपराध एवं मुद्दाहरुमा संलग्न रही फरार रहेका तथा अदालतबाट फैसला भई दण्ड, जरिवाना, दसौदी, कोर्ट फि र सरकारी बिगो समेत तिर्न बाँकी भएका व्यक्तीहरुको खोजी गर्ने कार्यलाई तीब्रता दिदै आएको छ ।