बेनी – म्याग्दीको मंगला गाउँपालिका -२ बाबियाचौर स्थित कच्ची सडकमा जिप दुर्घटना हुँदा जिपमा सवार १ जनाको मृत्यु भएको छ भने, दुई जना गम्भीर घाइते भएका छन् ।

आइतबार बिहान १० :५० बजे सोही गाउँपालिकाको लामपाटाबाट सल्यान तर्फ जाँदै गरेको प्र.२०३००१ च २५२ नंम्वरको बोलेरो जिप सडकबाट अन्दाजी ४०-५० मिटर तल खस्दा मंगला गाउँपालिका -२ बस्ने अन्दाजी १० -११  वर्षकी बालिका करिश्मा क्षेत्रीको घटनास्थलमै मृत्यु भएको प्रदेश प्रहरी कार्यालय पोखराले जनाएको छ ।

यस्तै दुर्घटनामा अन्य ५ जना घाइते भएका छन् । घाइतेहरु म्याग्दी मंगला गाउँपालिका -२ बस्ने वर्ष ४२ को चालक खोम बहादुर कटुवाल, सोही स्थान बस्ने अन्दाजी वर्ष ४० कि सुनिता क्षेत्री, अन्दाजी वर्ष ४५ कि सुकला के.सि, अन्दाजी वर्ष १० कि कृपा क्षेत्री र अन्दाजी वर्ष ३० का राजन जिसी रहेका छन् ।

घाइते मध्ये चालक खोम बहादुर कटुवाल र यात्रु सुनिता क्षेत्रीको अवस्था गम्भीर रहेको छ भने, अन्य सामान्य छन्  । घाइते सबैलाई उपचारका लागि जिल्ला अस्पताल बेनी लगिएको छ ।

घटनास्थलमा खटिएको प्रहरीको टोलीले घटनाका बिषयमा अनुसन्धान शुरु गरेको जनाएको छ ।