तनहुँ । विद्यार्थीलाई आगलागीको अवस्थामा गरिने उद्धार र आगो निभाउने हातेयन्त्र (फायर इस्टिंगुइसर)को कामको बारेमा जानकारी सोमबार तनहुँको आदिकवि भानुभक्त क्याम्पसमा प्रदर्शनी गरिएको थियो ।

आगलागी भएको ठाउँका लागी क्याम्पसको चौरमा प्याक र सुकेका घास दाउरा राखेर आगलागीको नमुना बनाईएको थियो। आगलागी हुँदा दमकल आउनुपूर्व नै आगो नियन्त्रण एवम् उद्धारका कार्य छिटो होस भन्ने उद्देश्यले उक्त प्रदर्शनी गरिएको हो ।

आगलागीपछिको उद्धारका लागि आगो निभाउने हातेयन्त्र (फायर इस्टिंगुइसर) का साथमा थिए गोल्डेन फायर फ़ाइटिङ् इन्टरप्राइजेज नेपालका प्राबिधिक तथा संचालक दिलिप मरासिनि । मरासिनीले बलिरहेको आगो प्रत्यक्ष निभाउदै त्यसको प्रयोगको विधिबारे क्याम्पसका विद्यार्थीलाई बताएका थिए ।

आगलागी हुने कारण, आगलागी भएपछि नियन्त्रण, आगलागीमा परेकाहरूको उद्धार, तत्काल उपचार तथा राहतका लागि विद्यार्थीलाई व्यावहारिक रूपमै कसरी सक्षम बनाउने भन्ने उद्देश्यले गरिएको आदिकवि भानुभक्त क्याम्पसले जनाएको छ ।

यसरी अचानक आगलागी भएमा कसरी उद्धार गर्ने भनेर विद्यार्थीले गरेको प्रयोगलाई क्याम्पसका प्राध्यापक, कर्मचारी र विद्यार्थीहरुले अवलोकन गरिरहेका थिए ।

आगलागीमा परेकाहरूलाई उद्धार गर्न सिकाउन, आगलागी नियन्त्रक हातेयन्त्र (फायर इस्टिंगुइसर) को प्रयोग लगायतका विषयमा विद्यार्थीलाई व्यावहारिक ज्ञान दिइएको थियो ।

सानोतिनो लापरबाहीले आगलागी जुनसुकै समयमा लाग्ने भएकोले आफ्नो घरटोलमा साँच्चै आगलागी हुँदा नआत्तिकन नियन्त्रण र उद्धारका लागि खट्न विद्यार्थीलाई ज्ञान र हौसला दिन क्याम्पसमा सो कार्यक्रम गरिएको क्याम्पस प्रमुख महाप्रसाद हड्खलेले बताए ।

उनले भने “आगलागिबाट सुरक्षित राख्न क्याम्पसले आफ्ना सबै भवन, प्रयोगशाला र कार्यालयहरुमा आगलागी नियन्त्रक हातेयन्त्र (फायर इस्टिंगुइसर) जडान गरेको छ ।”

आगलागी हुँदा दमकल एवम् सुरक्षाकर्मी भन्नेबित्तिकै पुग्ने अवस्था नरहने अवस्थामा विद्यार्थीले क्याम्पस स्तरमा जानकारी प्राप्त युवाले अग्नि नियन्त्रण एवम् उद्धारका कार्यमा महत्वपूर्ण भूमिका खेल्ने गोल्डेन फायर फ़ाइटिङ् इन्टरप्राइजेज नेपालका प्राबिधिक तथा संचालक दिलिप मरासिनिले बताए ।