नेकपा नेता तथा युवा संघ नेपालका पूर्व अध्यक्ष महेश बस्नेतले प्रचण्ड–माधव समूहलाई सूर्य चिह्नमा आँखा नलगाउन चेतावनी दिएका छन् ।

प्रचण्ड–नेपाल समुहले सूर्य चिन्हमा लोभी नजर लगाउन नहुने उनको भनाई थियो । ‘तपाईहरु सडकमा पनि जानुहुन्छ, निर्वाचन आयोगमा पनि जानुहुन्छ, अनि कसरी सूर्य चिन्हमा लोभी नजर लगाउने ?’ उनले प्रश्न गर्दै भने । उनले हिम्मत छ भने हंसिया हतौडा चुनाव चिन्ह लिन उनले चेतावनी दिएका छन् ।

ओली समूहको  बृहद युवा भेलालाई सम्बोधन गर्दै धम्कीपूर्ण शैलीमा उनले भने,‘सूर्य चिह्नमा आँखा नलगाउनुस्, सूर्य चिह्नमा आँखा लगाएको युवाहरुले मन पराएका छैनन्, म अहिलेलाई यतिमात्रै भन्न चाहन्छु ।’

नेता बस्नेतले युवा संघलाई टोल टोलमा साईबर सेना बनाउन निर्देशन दिए । ‘विप्लवकोजस्तो साम्राज्यवादीबिरुद्ध भनेर व्यापारीबिरुद्ध, चन्दा असुली र आतंक फैलाउन प्रयोग गर्ने होईन, प्रविधिमैत्री भएर पाईला पाईलामा युद्ध लड्ने साईबर सेना बनाउनुस्’–उनले भने ।

पूर्व मन्त्रीसमेत रहेका नेता बस्नेतले बिजय गच्छदार जेलको यात्रामा जाने क्रममा रहेको दाबी गरे । अख्तियारले गच्छदारलाई वाईडवडी काण्डमा जेल पठाउन लागेको उनको भनाई थियो । प्रधानमन्त्री केपी शर्मा ओलीले भ्रष्टचारीलाई कारवाही गर्न निर्देशन दिएको भन्दै अब धेरै नेता जेल जाने बताए । उनलेपनि अख्तियारलाई भ्रष्टाचारीलाई खुट्टा नकमाई कारवाही गर्न आग्रह गरे ।

प्रचण्ड–नेपाल समुहले उच्छृङ्खल तरिकाले वर्तमान प्रधानमन्त्री केपी शर्मा ओलीविरुद्ध नारा लगाएको उनको आरोप थियो ।