पोखरा । बेलायतको पाठ्यक्रमका आधारमा नेपालमै अन्तर्राष्ट्रिय स्तरको शिक्षा अध्ययन गराउने काठमाण्डौ वर्ल्ड स्कूलले पोखरामा अभिभावकहरुसँग शैक्षिक अन्तरक्रिया गरेको छ ।

स्कूलले अहिले देशैभरि अन्तरक्रियात्मक नेपाल टुर कार्यक्रम गरिरहेको छ । सोहि क्रममा  पोखरामा पनि साक्षात्कार कार्यक्रम आयोजना गर्दै स्कूलका प्रतिनिधीले पछिल्लो समयको शिक्षा परिस्कृत हुनुपर्नेमा जोड दिए ।

कार्यक्रममा बोल्दै स्कूलका अध्यक्ष ई. मिथलेस कुमार झाले अहिलेका बालबालिकाको प्रतिष्पर्धा नेपालका बालबालिकासंग मात्र नभई विश्वभरका विद्यार्थीसँग हुने भएकोले त्यही अनुसार तयार गर्दै जानुपर्ने धारणा राखे । झाले आईटी क्षेत्रमा धेरै भविष्य भएकोले त्यो तर्फ अभिभावकहरूले पनि ध्यान दिन आवश्यक रहेको बताए । उनले २०५० सम्ममा शिक्षाको नयाँ ट्रेन्ड आउने बताउँदै समय परिवेश अनुसार आफूलाई तयार गर्नुपर्नेमा जोड दिए ।

कार्यक्रममा काठमाडौ वर्ल्ड स्कुलका प्रिन्सिपल केशर बहादुर खुलालले आफ्ना सन्तान सफल भए मात्र अभिभावक सन्तुष्ट हुने बताउँदै बालबालिकाको शिक्षामा लगानी गरे मात्रै सन्तान सफल हुने दाबी गरे । सन्तानको भविश्यका लागि अभिभावकहरूले सही समयमा सही निर्णय गर्नुपर्ने उनको भनाइ छ ।

पोखराको कार्यक्रम अपेक्षित रुपमा सफल भएको ड्रिम हाइ नेपालका प्रमुख कमल जिसीले बताए । कार्यक्रमको सञ्चालन शैल्ताज कुँवरले गरेकी थिइन् ।

यो स्कूल नेपालमा शैक्षिक गुणस्तरका कारण विशिष्टकृत स्कूलका रुपमा परिचित छ । विद्यार्थीको राम्रो भविष्यका लागि अभिभावकलाई छोराछोरी पठाउन काठमाडौ वर्ल्ड स्कूलले आग्रह समेत गरेको छ । अन्तरक्रियात्मक कार्यक्रममा पोखराका शैक्षिक क्षेत्रका सरोकारवाला, अभिभावकहरुको बाक्लो सहभागिता रहेको थियो । सो स्कूल सूर्यविनायक ७ गुण्डु, भक्तपुरमा रहेको छ ।

आधुनिक सिकाइको माध्यमबाट विद्यालय हाताभित्रै स्वीमिङ पूल, बगैंचा, खेल मैदान लगायतका सुविधा सम्पन्न आधुनिक भौतिक संरचनामा कक्षा संचालन गरेको स्कूलले जनाएको छ ।

२०७५ सालदेखि सञ्चालनमा आएको स्कूलले यही वर्षदेखि क्याम्ब्रिज विश्वविद्यालय स्तरको शिक्षा अध्ययन गराउने प्रक्रियामा रहेको स्कूलले जनाएको छ । हाल कक्षा १ देखि ५ सम्म बेलायती पाठ्यक्रम, ६ देखि ९ सम्म राष्ट्रिय पाठ्यक्रम अध्यापन हुँदै आएको छ । कक्षा १२ मा अहिले विज्ञान, व्यवस्थापन, मानविकी तथा कानून संकायको अध्यापन हुँदै आएको स्कूलले जनाएको छ ।