पोखरा । गण्डकी प्रदेशको सत्ता ढाल्न विपक्षीहरुलाई हतारो भइरहेका बेला दिनैपिच्छे प्रदेशसभा बैठक स्थगित हुन पुगेको छ ।

विशेष अधिवेशनको पहिलो दिन मात्र मुस्किलले प्रदेशसभा चल्यो । मंगलबार पनि पीसीआर टेस्टको माग गर्दै सत्तापक्ष नेकपा एमालेकै सांसदहरुले सदन अवरुद्ध गरे । बुधबार भने अविश्वास प्रस्तावमाथि मतदान हुने भनिएकोमा सांसद नै सम्पर्कविहीन भएपछि अनिश्चितका लागि स्थगित भएको छ ।

सरकार फेरबदलमा निर्णायक देखिएको राष्ट्रिय जनमोर्चाका एक सांसद अनुपस्थित भएपछि नयाँ टुइस्ट देखा परेको हो । सांसद खिमविक्रम शाहीको मोबाइल दिनभर अफ रह्यो । यद्यपी, शाहीका स्वकीय सचिवले शाही बिरामी परेको भन्दै फेसबुक मार्फत जानकारी गराएका छन् ।

प्रदेशसभा अनिश्चितकालका लागि स्थगित

राष्ट्रिय जनमोर्चाले आफ्ना सांसद हराएकाले खोजी गरी पाँउ भन्दै निवेदन दिएपछि गण्डकी प्रदेशको विशेष अधिवेशन अर्काे सूचना नभएसम्मका लागि स्थगन गरिएको छ ।

मुख्यमन्त्री विरुद्धको अविश्वासको प्रस्तावमा आजै मतदान गराउने गरी कार्यसूची तयार भएको थियो । तर, अविश्वासको पक्षमा मत दिने सांसद नै अनुपस्थिति भएपछि सभामुख नेत्रनाथ अधिकारीले अनिश्चितकालसम्मका लागि विशेष अधिवेशन स्थगित गरेका छन् । सभामुख अधिकारी अविश्वासको प्रस्ताव ल्याउने माओवादी पार्टीबाट बनेका सभामुख हुन् ।

अविश्वासको प्रस्तावमाथि छलफल चलिरहेको बेलामा सभामुख अधिकारीले दिउँसो साढे ४ बजेसम्मका लागि बैठक स्थगित गरेका थिए । जनमोर्चाकी सांसद पियारी थापाले दिएको निवेदनपछि बैठक स्थगित भएको प्रदेश सभाका सचिव हरिराज पोखरेलले सूचनामार्फत जनाए । सांसद पियारीले संसदको कारवाही रोक्न माग गर्दै संसद सचिवालयमा निवेदन दिएकी हुन् ।  त्यसपछि अर्काे बैठक नै नबसी सूचना टाँसेर बैठक स्थगित भएको जानकारी गराइएको छ ।

जनमोर्चा पार्टीको केन्द्रले नै अविश्वास प्रस्तावको पक्षमा मतदान गर्ने निर्णय गरिसकेको अवस्था हो । अविश्वास प्रस्तावमा भने जनमोर्चाले हस्ताक्षर गरेन ।

जनमोर्चा सांसद खिमविक्रम शाही

२८ जनाको मात्र हस्ताक्षर रहेकोमा तीन सांसद रहेको जनमोर्चाका दुई सांसद पियारी थापा र कृष्ण थापा भने आजको प्रदेशसभा बैठकमा उपस्थित छन् ।

नयाँ सरकार बनाउन वा मुख्यमन्त्री पृथ्वीसुब्बा गुरुङले सरकार टिकाइराख्न ३१ मत आवश्यक पर्छ । काँग्रेस, माओवादी र जसपा गरी २८ मत मात्र हुन्छ ।

राष्ट्रिय जनमोर्चाको ३ मत सबै खसेमात्रै नयाँ सरकार बन्छ । नत्र, गुरुङ विरुद्ध ल्याइएको अविश्वास प्रस्ताव फेल हुनेछ र सरकार कम्तिमा १ वर्ष अघि बढ्छ ।

मनाङे अनुपस्थित तर मत पृथ्वीसुब्बाकै पक्षमा

यसैबीच, स्वतन्त्र सांसद राजीव गुरुङ उर्फ दीपक मनाङे पनि आजको बैठकमा अनुपस्थित रहे । उनले आफू स्वतन्त्र भन्दै राष्ट्रिय जनमोर्चाले जता जस्तो निर्णय गर्छ, त्यसमै उभिने सार्वजनिक अभिव्यक्ति दिएका थिए । तर, श्रोतका अनुसार दीपक मनाङेले पृथ्वीसुब्बा गुरुङकै पक्षमा मत जाहेर गर्नेछन् ।