पोखरा । स्वतन्त्र सांसद राजीव गुरुङ उर्फ ‘दीपक मनाङे’ गण्डकी प्रदेशको युवा तथा खेलकुद मन्त्री बनेका छन् । मनाङको प्रदेशसभा ‘ख’ बाट नेकपा एमालेकै समर्थनमा चुनाव जितेका उनलाई सरकारकै भर नहुँदा खेलकुद मन्त्रालयको जिम्मेवारी मुख्यमन्त्री पृथ्वीसुब्बा गुरुङले सुम्पेका हुन् ।

उनलाई प्रदेश नीति तथा योजना आयोगको हलमा गण्डकी प्रदेशका प्रमुख अमिक शेरचनले सपथ ग्रहण गराए । आडैमा मुख्यमन्त्री गुरुङ उभिए तर सभामुख र प्रतिपक्षी दलका नेताहरु भने सहभागी भएनन् । मनाङे यसअघि प्रदेश सभाको अर्थ तथा विकास समितिको सदस्य थिए । तर, काम चित्तबुझ्दो नभएको भन्दै राजीनामा दिएका थिए ।

सपथअघि उनले केही पत्रकारहरुसँग अनौपचारिक कुरा पनि गरे । सपथ ग्रहणका लागि आयोग हलमा पुगेका मनाङेले पत्रकारहरुसँग ठट्टा गरे, फोटो खिचाए । उनले आफूसँग युवाका लागि बिजनेश प्लान रहेको भन्दै स्पोर्टसमा काम गर्ने टीम आफूसँग रहेको सुनाए । धेरै गर्नुपर्ने देश होइन भन्दै उनले ४–५ वटा काम राम्रो गरे पुग्ने समेत उल्लेख गरे ।

आफू खेल क्षेत्रकै रहेकाले पनि ‘नलेज’ रहेको उनको कथन छ । मन्त्री पद पाएको बारे उनले खुलेर बताएनन् । काम गर्ने हो भनेर मुख्यमन्त्रीले भन्दा आफूले हुन्छ भनेर स्विकारेको मनाङेको भनाई छ ।

एकै मन्त्रालयलाई धेरै जिम्मेवारी दिँदा काम प्रभावकारी नहुने मुख्यमन्त्री र आफ्नो विचार मिलेको भन्दै उनले आफ्नो मन्त्रालय कता छ भनेर पनि थाहा नभएको भन्दै ठट्टा गरे । निलो कोट र नयाँ दौरा सुरुवालमा ठाँटिएका उनले भने ‘दौरा सुरुवाल किन्न जाउँ भन्नुभयो, गएँ ।’

दीपक मनाङे गण्डकीको युवा तथा खेलकुद मन्त्री