पोखरामा ठूलो सरकारी अस्पताल पश्चिमाञ्चल क्षेत्रीय अस्पतालसमा कोभिडका बिरामीको उपचार निःशुल्क छ । यससँगै दुई निजी अस्पतालमा समेत अब पैसा तिर्नुपर्नेछैन । पोखराको गण्डकी मेडिकल कलेज, पृथ्वीचोक र मनिपाल शिक्षण अस्पताल, फुलबारीमा कोरोना संक्रमितको उपचारमा बिरामीका परिवारले पैसा तिर्न नपर्ने भएको हो । खर्च सरकारले व्यहोर्नेछ ।

देशभरका ३० वटा अस्पतालमा कोरोना संक्रमितको उपचार गर्दा लाग्ने खर्च सरकारले व्यहोर्ने भएको हो । स्वास्थ्य तथा जनसंख्या मन्त्रालयसँग कोभिड–१९ केयर युनिट सञ्चालन सम्बन्धि सम्झौता गरेका अस्पतालमा संक्रमितको उपचार निःशुल्क हुने भएको हो ।

यदि कोही बिरामीले पैसा तिर्छु क्याबिनमा बसेर उपचार लिन्छु भन्यो भने पाउने तर, त्यो पैसा सरकारले नबेहोर्ने मन्त्रालयका प्रवक्ता समीर अधिकारी बताउँछन् । ‘कसैले म सरकारलाई भार पार्दिन आफैं पैसा तिरेर उपचार गर्छु पनि भन्न पाउनुहुन्छ,’ उनले भने, ‘तर, अस्पतालको क्याबिन लगायतका अन्य सुविधा लिएर उपचार लिनेको पैसा सरकारले तिर्दैन ।’

कुन–कुन अस्पताल ?

प्रदेश १ को विराटनगरस्थित नोबेल मेडिकल कलेज शिक्षण अस्पताल ।

प्रदेश २ को विरगन्जस्थित नेशनल मेडिकल कलेज र जनकपुरको जानकी मेडिकल कलेजमा संक्रमितको उपचार निःशुल्क हुन्छ ।

बागमती प्रदेशअन्तर्गत काठमाडौं सिभिल अस्पताल, चितवन मेडिकल कलेज, कलेज अफ मेडिकल साइन्स भरपुर, नेपाल मेडिकल कलेज, नेशनल मेडिकल कलेज, पिपल्स डेन्टल कलेज एन्ड डेन्टल अस्पताल । चितवनस्थित वीपी कोइराला मेमोरियल क्यान्सर अस्पताल, काठमाडौं नेशनल मेडिकल कलेज, महेन्द्र नारायण निधि मेमोरियल अस्पताल, समिट अस्पताल, हेल्पिङ हेन्ड्स सामुदायिक अस्पताल, नेपाल भारत मैत्री अस्पताल, बज्रबाराही चापागाउँ अस्पताल । आनन्दबन अस्पताल, काठमाडौं युनिभर्सिटी स्कुल अफ मेडिकल साइन्स, काठमाडौं मेडिकल कलेज, मेडिकेयर अस्पताल ।

गण्डकी प्रदेशमा गण्डकी मेडिकल कलेज र मणिपाल कलेज अफ मेडिकल साइन्स ।
लुम्बिनी प्रदेशमा युनिभर्सल कलेज अफ मेडिकल साइन्सेस र गुल्मीको रेसुङ्गा अस्पताल ।

सुदूरपश्चिम प्रदेशमा निसर्ग हस्पिटल एन्ड रिसर्च सेन्टर, माया मेट्रो अस्पताल, पद्म अस्पताल, कैलाली अस्पताल, नवजीवन अस्पताल, सुदूरपश्चिम सामुदायिक अस्पताल ।