पोखरा।  जिल्ला प्रशासन कार्यालय कास्कीले जारी राखेको निषेधाज्ञा खुकुलो गर्दै साउन २० गतेसम्म थप गरेको छ ।

प्रमुख जिल्ला अधिकारी थानेश्वर गौतमद्वारा जारी विज्ञप्तिमा सोमबार रातिदेखि सकिन लागेको निषेधाज्ञाको समय थप १५ दिन लम्ब्याइएको हो । निषेधाज्ञा साउन २० गते राति १२ बजेसम्म जारी रहने छ ।

विज्ञप्ति अनुसार अब कास्की भित्र चल्ने निजी सवारीसाधन र ट्याकसीको हकमा चालकसहित बढीमा ४ जना सवार रही स्वास्थ्य सम्बन्धी मापदण्ड अपनाएर निर्वाध चल्न पाउनेछन् । जसमा मोटरसाइकल तथा स्कुटरले पनि मापदण्ड अपनाएर निर्वाध संचालन हुन पाउनेछन् ।

यस्तै लामो दूरीका सवारी साधनहरुले निश्चित संख्यामा सम्बन्धित यातायात व्यवसायी संघ संस्था र जिल्ला प्रशासन कार्यालयको सिफारिसमा सवारी संचालन गर्न पाउने भएका छन् । जसका लागि स्विकृत गरिएको सिट संख्या भन्दा बढी यात्रु राख्न पाइने छैन । चालक तथा सहचालकले अनिवार्य फेससिल्ड प्रयोग गर्नुपर्ने छ भने, यात्रुले मास्क अनिवार्य लगाउनु पर्ने छ ।

यस्तै विश्वविधालय, क्याम्पस एवं माध्यामिक विद्यालयहरुले पूर्व निर्धारित परीक्षाहरु नेपाल सरकार कोभिड -१९ संकट व्यवस्थान केन्द्रको साउन ३ गतेको परीक्षा संचालन सम्बन्धमा अपनाउनुपर्ने सावधानीका उपायहरु कडाईका साथ पालना गरी पूर्ण रुपमा स्वास्थ्य मापदण्ड पालना गरी संचालन गर्न सक्ने भएका छन्।

यस्तै होटल तथा रेष्टुरेन्टहरुले अनलाइन डेलिभरी राति ८ बजेसम्म मापदण्ड अपनाएर संचालन गर्न पाउने छन्।भने, होटलमा बास बस्न आउने पाहुनालाई बेड क्षमताको ५० प्रतिशतसम्म रहने गरी खान बस्नको प्रवन्ध गर्न सक्नेछन् । तर, एका घरका परिवारबाहेक १ कोठामा १ जना भन्दा बढी व्यक्ति राख्न पाइने छैन । ।