राष्ट्रिय स्वतन्त्र पार्टीका सभापति रवि लामिछानेसँग सम्बन्धित सम्पत्ति शुद्धीकरण र संगठित अपराध मुद्दा फिर्ता गर्ने निर्णयविरुद्ध दायर गरिएको रिट निवेदनमाथि सर्वोच्च अदालतमा आज पनि सुनुवाइ पूरा हुन सकेन। सुनुवाइ नसकिएपछि अदालतले मुद्दालाई पुनः ‘हेर्दाहेर्दै’मा राखेको छ।

सोमबार न्यायाधीश सारङ्गा सुवेदी र सुनिलकुमार पोखरेलको संयुक्त इजलासमा यस विषयमा बहस भएको थियो। तर समय अभावका कारण बहस टुंगिन नसकेपछि अर्को सुनुवाइ मंगलबारका लागि तय गरिएको अदालत स्रोतले जनाएको छ।

यसअघि आइतबार पनि सोही मुद्दामा प्रारम्भिक सुनुवाइ भएको थियो। त्यतिबेला पनि बहस अधुरो रहेपछि मुद्दालाई ‘हेर्दाहेर्दै’मा राखेर सोमबारका लागि सारिएको थियो।

यस प्रकरणमा अघिल्लो इजलासले रिटलाई नियमित सुनुवाइका लागि पेस गर्न आदेश दिएको थियो। त्यसपछि हाल उक्त विषयमा विस्तृत बहस जारी रहेको छ।

सरकारतर्फबाट लामिछानेमाथि पहिले दर्ता गरिएका सम्पत्ति शुद्धीकरण र संगठित अपराधसम्बन्धी मुद्दा फिर्ता लिन प्रक्रिया अघि बढाइएको थियो। सो निर्णयविरुद्ध विभिन्न अधिवक्ताले सर्वोच्च अदालतमा छुट्टाछुट्टै रिट दायर गरेका थिए।

यसबीच अदालतले अन्तिम निर्णय नदिएसम्म जिल्ला अदालतमा रहेको मुद्दाको प्रक्रियामा पनि तत्काल कुनै नयाँ निर्णय नहुने बताइएको छ। यद्यपि लामिछानेमाथि लागेको सहकारी ठगीसम्बन्धी मुद्दा भने अलगै रूपमा कायम रहने अवस्था रहेको छ।

न्यायाधीश पोखरेलविरुद्ध न्याय परिषद्मा उजुरी, निवेदन अस्विकार