काठमाडौँ । नेकपा माओवादी केन्द्रका अध्यक्ष पुष्पकमल दाहालले नेकपा एमालेका अध्यक्ष केपी ओलीलाई नेपालकै भ्रष्ट र जाली नेता भएको आरोप लगाएका छन् ।

माओवादी पार्टी कार्यालय कोटेश्वरमा गरिएको सूर्यनाथ राम यादवको स्मृति दिवस कार्यक्रममा ओलीविरुद्ध खनिदै उनले ओली जत्तिको झुटो बोल्ने व्यक्ति नेपालमा अरु कोही नभएको समेत दाबी गरे ।

उनले केपी ओलीको परिचय नै धोकेबाज भएको भएपनि अरुलाई नै धोकेबाज भनेर सजिलै भन्ने गरेको पनि टिप्पणी गरे ।

उनले योगेश भट्टराई, घनश्याम भुषालहरुले नै हिजो ओलीविरुद्ध कडा टिप्पणी गरेको भएपनि अहिले ती दश नेताले ओलीसँग आत्मसमर्पण गरेको आरोप लगाए । दाहालले भने, ‘केपीको निरंकुशता पनि थाहा छ तिनीहरुलाई । केपी ओली नेपालको एउटा भ्रष्ट र जाली नेता भन्ने उहाँहरुलाई थाहा छ । मलाई उहाँहरुले सिकाएको हो । घनश्याम, योगेश, गोकर्णलगायत १० जनाले सिकाएको हो ओली यस्ता छन् भनेर । दह्रोसँग टेक्नुस् हामी छौं भन्नुहुन्थ्यो । अन्त्यमा सबैले आत्मसमर्पण गर्नुभयो । अनौठो लागेको छ ।’

दाहालले माधव नेपाल, झलनाथ खनाललगायत नेता भने सही ट्र्याकमा हिँडेको र आफूहरुले सहयोग गरेको बताए ।