प्रमुख प्रतिपक्ष दल नेकपा (एमाले) का सांसद खगराज अधिकारीले नेपाललाई सरकारले नै कालो सूचीमा पार्ने प्रयास गरिरहेको आरोप लगाएका छन् ।

सरकारले ल्याएको प्रतिस्थापन विधेयकमा करिब २१/२२ अर्ब कालो धनलाई वैधानिकता दिने गरी प्रावधान ल्याएको भन्दै उनले सरकारले नेपाललाई कालो सूचीमा पार्ने प्रयास गरिरहेको आरोप लगाएका हुन् ।

सोमबार प्रतिनिधिसभा बैठकबाट बाहिरिने क्रममा अधिकारीले सञ्चारकर्मीलाई प्रतिक्रिया दिँदै भने, ‘हुँदाहुँदा लुटिएका झण्डैझण्डै २१/२२ अर्ब अन्तर्राष्ट्रिय कानुन, आतंककारी कानुनसमेत आकर्षित हुने कानुनलाई समेत उलंघन गरेर यो देशलाई नै कालो सूचीमा पार्ने गम्भीर बाटोमा सरकार गइरहेको छ ।’

सांसद अधिकारीले सरकारले दलीय व्यवस्थालाई नै समाप्त पार्न अवरुद्ध संसदलाई सञ्चालनका लागि पहल गनरेको तर्क गरे ।

सरकार तमासा हेरेर बसेको छ

नेता अधिकारीले लगातार संसदमा बिरोध हुँदा पनि सरकार तमाशा हेरेर बसेको आरोप लगाए । अधिकारीले आफूलाई लोकतन्त्रवादी भन्ने कांग्रेस नेतृत्वको सरकारले संसद्मा देखिएको गतिरोध अन्त्य गर्न कुनै भूमिका निर्वाह नगरेको र तमाशा हेरेर बसेको आरोप लगाएका हुन् ।

उनले सरकारले अहिले गैरजिम्मेवार प्रवृति देखाएको आरोप पनि लगाए । अधिकारीले अकस्मात संसद् बन्द गरी दलीय व्यवस्थालाई समाप्त गर्ने सत्ता गठबन्धनको षडयन्त्रको जारी रुप संसद्मा देखिएको धारणा व्यक्त गरे । त्यस्तै उनले सरकार आफ्नो नीति र सिद्धान्तमा विश्वस्त नरहेको पनि बताए ।