काँग्रेसको भाग बढ्यो, नेकपा एस र जसपाको घट्यो, नेकपा एसलाई प्रदेश १ र बागमतीमा मुख्यमन्त्री, जसपालाई उपसभामुख

काठमाण्डौ । शेरबहादुर देउवा नेतृत्वमा सरकार बनेको तेस्रो महिनामा बल्ल मन्त्रीपरिषद् विस्तार गर्न नेताहरु सफल हुँदेछन् । सत्ता गठबन्धन आबद्ध दलहरूबीच मन्त्रालय भागबन्डाको टुङ्गो लागेको छ । गठबन्धन आबद्ध दलहरूका बीचमा भएको नयाँ सहमति अनुसार काँग्रेसको भाग बढेको छ भने माओवादी केन्द्रको भाग यथावत् रहँदै नेकपा एकीकृत समाजवादी र जसपाको भाग घटेको छ ।

नेकपा एसलाई प्रदेश १ र बागमती प्रदेशको मुख्यमन्त्री दिने सहमति बनेको छ । यस्तै, जसपालाई प्रतिनिधि सभामा उपसभामुख दिने सहमति गठबन्धन आबद्ध चार दलबीच बनेको छ ।

प्रधानमन्त्रीको सरकारी निवास बालुवाटारमा बिहीबार भएको सत्ता गठबन्धन आबद्ध दलका शीर्ष नेताहरूको बैठकपछि मन्त्रालय बाँडफाँडमा नयाँ सहमति बनेको हो । यो सहमतिसँगै मन्त्रीपरिषद्ले भोलि शुक्रवार पूर्णता पाउने भएको छ ।

सहमतिअनुसार काँग्रेसले ८ मन्त्री र एक राज्यमन्त्री पाउने छ । माओवादी केन्द्रले ५ मन्त्री र एक राज्यमन्त्री पाउने भएको छ । त्यस्तै, नेकपा एसले ४ मन्त्री र एक राज्यमन्त्री तथा जसपाले ४ मन्त्री पाउने भएका छन् । यसअघि गत मङ्गलवार भने काँग्रेसले ७, माओवादी केन्द्र, एकीकृत समाजवादी र जसपाले पाँच-पाँच मन्त्री र एक-एक राज्यमन्त्री पाउने सहमति भएको थियो ।

प्रधानमन्त्री स्वकीय सचिवालयका अनुसार मन्त्रीको सङ्ख्यामा सहमति जुटेको र शुक्रवार शपथका लागि तयारी भइरहेकोछ ।

कसलाई कुन मन्त्रालय ?

कांग्रेसले रक्षा, सञ्चार तथा सूचना प्रविधि, उद्योग वाणिज्य तथा आपूर्ति, युवा तथा खेलकुद, महिला बालिका तथा ज्येष्ठ नागरिक, कृषि तथा पशुपक्षी मन्त्रालय लिने भएको हो । कांग्रेसले रक्षा मन्त्रालयका लागि निकै लामो कसरत गरेको थियो ।

कांग्रेसले स्वास्थ्य मन्त्रालय भने छाड्न सहमत भएको एक कांग्रेस नेताले जानकारी दिए । यस्तै कांग्रेससँग गृह, परराष्ट्र र कानुन न्याय तथा संसदीय मामिला मन्त्रालय यथावत् रहने छ ।

यसैगरी, सत्ता गठबन्धनमा दल माओवादी केन्द्रले ५ मन्त्री र एक राज्यमन्त्री पाउने भएको छ । माओवादी केन्द्रले अब भूमि व्यवस्था, सहकारी तथा गरिबी निवारण, शिक्षा, विज्ञान तथा प्रविधि र खानेपानी मन्त्रालय पाउने भएको हो । सो दलले अर्थ र ऊर्जा, जलस्रोत तथा सिँचाइ मन्त्रालय हाल सम्हाल्दै आएको छ ।

यसैगरी, नेकपा एकीकृत समाजवादीले ४ मन्त्री र एक राज्यमन्त्री पाउने भएका छन् । स्वास्थ्य तथा जनसङ्ख्या, सहरी विकास, संस्कृति पर्यटन तथा नागरिक उड्डयन र श्रम तथा रोजगार मन्त्रालय नेकपा एसको भागमा परेको हो ।

यस्तै, जसपाले चार मन्त्री पाउँदै छ । जसपाले भौतिक पूर्वाधार तथा यातायात, सङ्घीय मामिला तथा सामान्य प्रशासन, वन तथा वातावरण मन्त्रालय पाउने छ ।