नेपाली कांग्रेसमा मन्त्रालय भागवण्डाको किचलो सकिएको छैन ।  वरिष्ठ नेता रामचन्द्र पौडेल पक्ष तत्काल सरकारमा सहभागी हुने सम्भावना कम देखिएको छ।

पार्टीको भागमा परेकामध्ये तीन मन्त्रालय पाउनुपर्ने अडान राखेको पौडेल समूह भनेअनुसार नहुने भएपछि तत्काल सरकारमा सहभागी हुने सम्भावना न्यून देखिएको हो।

गत बुधबार प्रधानमन्त्रीको सरकारी निवास बालुवाटारमा बसेको पदाधिकारी तथा पूर्वपदाधिकारीको बैठकमा पौडेल समूहले तीन मन्त्रालय पाउनुपर्ने अडान राखेको थियो। तर पार्टी सभापतिसमेत रहेका प्रधामन्त्री शेरबहादुर देउवाले दुई मन्त्रालय मात्रै दिने बताएपछि पौडेल समूह छलफल निष्कर्षमा नपुग्दै बैठकबाट बाहिरिएको थियो।

स्रोतले शुक्रबार पौडेल समूहबाट मन्त्रिपरिषद्मा प्रतिनिधित्व हुने सम्भावना न्यून रहेको दाबी गरेको छ। प्रधानमन्त्री देउवा पौडेल पक्षलाई दुई र कृष्णप्रसाद सिटौला समूहलाई एउटा मन्त्रालय दिने योजनामा छन्।