नेकपा एमालेले कास्कीका ५ पालिकामध्ये ३ पालिकामा सर्वसम्मत नेतृत्व चयन गरेको छ । मंगलबारदेखि सुरु भएको पहिलो पालिका अधिवेशनमा मादी, रुपा र अन्नपूर्ण गाउँपालिकामा सहमतिमा नेतृत्व चयन गरिएको हो । पोखरा महानगरपालिका र माछापुच्छ्रेमा भने सहमति नहुँदा नेतृत्व चयन हुन सकेको छैन ।

मादी गाउँपालिका कमिटीको अध्यक्षमा बालकृष्ण गुरुङ, उपाध्यक्षमा एकजंग गुरुङ, सचिवमा सुवास सापकोटा, उपसचिवद्वयमा राजु अधिकारी र प्रतिक्षा पौडेल चयन भएका छन् ।

अन्नपूर्ण गाउँपालिका कमिटिको अध्यक्षमा विवेक देवकोटा, उपाध्यक्षमा मीनाकुमारी गुरुङ, सचिव मदनप्रसाद पौडेल, उपसचिवमा दानबहादुर केसी र विराज सुवेदीलाई चयन गरिएको छ ।

यस्तै, रुपा गाउँपालिका कमिटी अध्यक्षमा पुन: सवाबक्स मियाँ निर्विरोध चयन भएका छन् । उपाध्यक्षमा निलकण्ठ रेग्मी, सचिवमा टेक बहादुर गुरुङ्ग, उपसचिवमा सोम सुनारी र बल बहादुर श्रेष्ठ चयन भए ।

माछापुच्छ्रे गाउँपालिकाको अधिवेशन भने स्थगन गरिएको छ । उद्घाटन समारोहपछि नेतृत्व चयन प्रक्रिया सुरु भएकाेमा आकांक्षीबीचमा सहमति नजुटेपछि उम्मेदवारको सहमतिमा अधिवेशन स्थगन गरिएको गाउँपालिका अध्यक्ष कर्णबहादुर गुरुङले जानकारी दिए । अध्यक्षका आकांक्षीबीच छलफल गरेर उनीहरुबीचको सहमतिअनुसार निर्वाचन प्रक्रिया सुरु हुनेछ । अध्यक्षका लागि विक्रम गुरुङ, महेश्वर दवाडी, यदुराम अधिकारी र पानबहादुर जिसीले मनोनयन दर्ता गराएका छन् ।

यसैगरी, पोखरा महानगरपालिकामा आजदेखि निर्वाचन प्रक्रिया सुरु भएको छ । पोखराको नेतृत्व लिनका लागि दीपक पौडेल, तेजनारायण अधिकारी, दिलीप न्यौपाने, धनबहादुर नेपाली र हरिप्रसाद त्रिपाठी आकांक्षी छन् ।