गत २७ भदौमा आफ्नो सम्पति कति छ कन्फ्युज छु भनेका गण्डकी प्रदेशका युवा तथा खेलकुदमन्त्री राजीव गुरुङ (दीपक मनाङे)ले सम्पत्ति विवरण सार्वजनिक गरेका छन् । केटाहरुलाई लगानी गरिदिएका कारण उनीहरुबाट आइनसक्दा समयमै सम्पति विवरण सार्वजनिक गर्न नसकेको उनले त्यो बेला बताएका थिए ।

अहिले सार्वजनिक विवरणमा अर्कैको नाममा जग्गा र आफू डेढ करोड ऋणमा रहेको उल्लेख छ । मन्त्री नियुक्त भएको ६० दिनभित्र सम्पति विवरण पेश गर्नुपर्ने प्रावधान छ । २ जना बाहेक अन्य ९ जना मन्त्रीले भदौ ९ मा सम्पति सार्वजनिक गरेका थिए । त्यसबेला मनाङेले सम्पति विवरण बुझाएका थिएनन् भने भूमि व्यवस्था कृषि तथा सहकारी मन्त्री चन्द्रबहादुर बुढा कोरोना लागेका कारण असमर्थ भएको बताएका थिए ।

गत जेठ २९ गते तेस्रो पटक खेलकुद मन्त्रीमा नियुक्त भएका मनाङेले असोज १८ गते आफ्नो सम्पत्ति विवरण मुख्यमन्त्री तथा मन्त्रिपरिषद्को कार्यालयमा बुझाएका थिए ।

मनाङ प्रदेश सभा ‘ख’ बाट निर्वाचित मनाङेले स्थाथी ठेगाना काठमाडौं–२९ उल्लेख गरेका छन् भने हालको ठेगाना पोखरा–१४ काजीपोखरी लेखेका छन् ।

आफूसँग २२ तोला सुन रहेको मनाङेले उल्लेख गरेका छन् । ४५ तोला चाँदी मनाङेसँग छ । पैतृक सम्पतिका रुपमा मुगाको माला ८३ तोला रहेको उनले उल्लेख गरेका छन् ।

मनाङेले एभरेष्ट बैंक पोखरामा १० लाख ४९ हजार ५ सय ३६ रुपैयाँ रहेको उल्लेख गरेका छन् । मनाङेले ६ करोड १० लाख रुपैयाँ ऋण लिएर ४ करोड ७० लाख रुपैयाँ तिरेको सम्पति विवरणमा उल्लेख गरेका छन् । संघर्ष गाईभैंसी प्रालिमा भैंसी २० वटा र गाई ५ वटा रहेको मनाङेले बताएका छन् ।

मनाङेले २०७० सालमा अकुत सम्पत्ति जोडेको आरोपमा सम्पत्ति शुद्धीकरणको मुद्दा खेपेका थिए । २०७४ सालमा उनले विशेष अदालतबाट सफाइ पाएका थिए ।

‘केटाहरू’को नाममा थुप्रै लगानी गरेको बताएका मनाङले सम्पत्ति विवरणमा अर्कैको नामको जग्गामा बैनापट्टा गरेको देखाएका छन् । तर, ती लगानीको स्रोत भने मनाङेले उल्लेख नै गरेका छैनन् ।

मनाङेले प्रकाश, कृष्ण र श्याम महर्जनको नाममा काठमाडौं–२९ धर्मस्थलीमा क्रमशः कित्ता नम्बर २४, ६७, ७६ को जग्गा रहेको खुलाएका छन् । जग्गा प्रतिआना ९ लाख रुपैयाँमा किनेको उल्लेख गरेका छन् ।

कृषिमन्त्रीको बुढाको केही छैन

गण्डकी प्रदेश सरकारका भूमि व्यवस्था, कृषि तथा सहकारी मन्त्री चन्द्रबहादुर बुढाको सम्पति विवरण पनि मन्त्रालयको वेबसाइटमा सार्वजनिक भएको छ । सार्वजनिक विवरणअनुसार कृषिमन्त्री बुढा ११ मन्त्रीहरुमध्ये गरीब देखिएका छन् । उनले आफ्नो नाममा केही देखाएकै छैनन् ।

उनको नाममा कुनै सम्पत्ति छैन । एउटा सहकारीमा १० हजार रुपैयाँ बचत मात्र उल्लेख छ । बागलुङ ताराखोला गाउँपालिका वडा नम्बर ५ घर भएका बुढाले सगोलमा जग्गा भएको उल्लेख गरेका छन् । तर, कित्ता र क्षेत्रफल खुलाएका छैनन् । एभरेस्ट बैंकको खातामा ब्यालेन्स छैन ।

उनले सम्पत्तिको नाममा ताराखोला–५ को जनएकता बहुउद्धेश्यीय सहकारीमा १० हजार रुपैयाँमात्र शेयर रहेको उल्लेख गरेका छन् । घरजग्गा, पशुधन, आफूसँग रहेको सामानसमेत सम्पत्ति विवरणमा उल्लेख गर्नुपर्ने भए पनि बुढाले भने कुनै पनि उल्लेख गरेका छैनन् ।

सम्बन्धित समाचारः

खोइ सम्पत्ति विवरण ? मन्त्री मनाङेको जवाफ: ‘केटाहरुले दिइसकेका छैनन्’

खोइ सम्पत्ति विवरण ? मन्त्री मनाङेको जवाफ: ‘केटाहरुले दिइसकेका छैनन्’

गण्डकीका मुख्यमन्त्रीको २५ लाख ऋण, अर्थमन्त्रीको निफ्राको ६० कित्ता शेयर, शिक्षामन्त्री मेखलालको १ किलो १९ तोला सुन
९ ले बुझाए, २ ले बुझाउन बाँकी

गण्डकीका मुख्यमन्त्रीको २५ लाख ऋण, अर्थमन्त्रीको निफ्राको ६० कित्ता शेयर, शिक्षामन्त्री मेखलालको १ किलो १९ तोला सुन