काठमाडौँ । नेपाली कांग्रेसको महामन्त्री पदमा गगनकुमार थापा र विश्वप्रकाश शर्मा निर्वाचित भएका छन् ।

आज बिहीबार भएको मतगणनामा गगनकुमार थापाले तीन हजार २३ मत र विश्वप्रकाश शर्माले एक हजार ९८४ मत प्राप्त गरेका हुन् ।

परिणाम कांग्रेसको निर्वाचन समितिले घोषणागर्न बाँकी रहेको छ ।

थापा डा. शेखर कोइरालाको समूहबाट उम्मेदवार बनेका हुन् भने शर्मा प्रकाशमान सिंहको समूहबाट उम्मेदवार बनेका हुन् ।

यसैगरी सभापति शेरबहादुर देउवाको पक्षबाट उम्मेदवार बनेका डा. प्रकाशशरण महतले १५५० मत प्राप्त गरेका छन् भने प्रदीप पौडेलले १४०९ मत ल्याए । कोइराला पक्षबाटै उम्मेदवारी दिएका डा. मीनेन्द्र रिजालले ८०९ मत र विमलेन्द्र निधि समूहबाट उम्मेदवार बनेका राजाराम कार्कीले १०७ मत ल्याएका छन् ।

सभापतिमा देउवा निर्वाचित भइसकेका छन् भने उपसभापतिमा देउवा समूहका पूर्णबहादुर खड्का र कोइराला समूहका धनराज गुरुङ निर्वाचित भइसकेका छन् ।

गत सोमबार भृकुटीमण्डपमा भएको मतदानमा कुल ४ हजार ६ सय ७९ मत खसेको थियो । कांग्रेसमा यसपटक सभापतिसहित १३४ पदमा निर्वाचन भएको हो ।

अब सह–महामन्त्री र केन्द्रीय सदस्यहरुको मतगणन हुने बताइएको छ ।