काठमाडौं । नेपाल मजदुर किसान पार्टीका सांसद प्रेम सुवालले सरकारले एमसीसी सम्झौंता संसदबाट पारित गरेकै कारण नेपालमा आर्थिक संकट र मूल्यवृद्धि बढेको दाबी गरेका छन्।

आइतबार प्रतिनिधिसभा बैठकमा विनियोजन विधेयक २०७९ को विभिन्न शिर्षकमाथिको खर्च कटौति प्रस्ताव पेश गर्दै उनले एमसीसी अनुमोदन गरेकै कारण मूल्यवृद्धि बढेको दाबी गरेका हुन्।

‘गठबन्धनले एमसीसी पारित गरेपछि आर्थिक संकट बढ्यो, यसको प्रमाण हामी दिन सक्छौं। अमेरिकाले शेरबहादुर देउवा सरकारलाई संयुक्त राष्ट्र संघको सुरक्षा परिषद्मा रुसको विपक्षमा मतदान गर्न दबाब दिएका कारण आर्थिक संकट बढेको हो।’ सुवालले भने।

सो विषयमा तटस्थ बसेको भारतले अहिले पनि अन्तराष्ट्रिय बजार मूल्यको एक तिहाई मूल्यमा पेट्रोलियम पदार्थ र एलपी ग्याँस पाएपनि नेपालले रुसको विरुद्धमा मतदान गरेकाल महँगोमा आयात गर्नु परेको उनको भनाई थियो।

सांसद सुवालले प्रधानमन्त्री शेरबहादुर देउवाको कूटनीतिक असफलताको कारण नेपालले महँगोमा पेट्रोलियम पदार्थ तथा एलपी ग्याँस आयात गर्नु परेको भन्दै आक्रोश व्यक्त गरे।