पोखरा। लागु औषध विरुद्ध सचेतना जगाउने उदेश्यले पोखरामा एक हप्ते सचेतना ‘एन्टी ड्रग क्याम्पेन’ शुरु हुने भएको छ। जिल्ला प्रहरी कार्यालय कास्कीको आयोजनामा असार ६ गतेदेखि १२ गतेसम्म पोखरा सभागृहमा उक्त कार्यक्रमको आयोजना गरिने कास्कीका प्रहरी उपरीक्षक गणेश थापाले आज आयोजित पत्रकार सम्मेलनमा जानकारी दिए।

थापाका अनुसार सप्ताहाव्यापी कार्यक्रम अन्तर्गत असार ६ गते विभिन्न सांगितक कार्यक्रम तथा लागू औषध सम्बन्धी सचेतना, ७ गते कास्की जिल्लामा रहेका पुनर्स्थापना केन्द्रमा रहेकाहरुसँग अन्तरक्रिया, ८ गते पोखराका औषधी विक्रेताहरूसँग अन्तरक्रिया, ९ गते विभिन्न स्कूल तथा कलेजहरूका विद्यार्थीहरूसँग अन्तरक्रिया, १० गते सम्बन्धित विषय विज्ञसँग टि.भी. टक शो कार्यक्रम, ११ गते समुदाय भेटघाट र अन्तरक्रिया र १२ गते अन्तराष्ट्रिय लागु औषध दिवसको उपलक्ष्यमा पोखरामा साइकल र्‍याली सहित समापन गर्ने कार्यक्रम रहेको एसपी थापाले जानकारी दिए ।

कार्यक्रमको पहिलो दिनको सांगितिक कार्यक्रमका लागि पोखराका र्‍यापर आशिष राना ‘लाहुरे’ ले प्रस्तुति दिनेछन्।

र्‍यापर लाहुरे लागु औषध कसुर मुद्धामा ५६ दिन जेलमा बसेर केही समय अगाडि छुटेका हुन्। उनले आफू जेलमा रहँदा कास्की प्रहरीको सकारात्मक व्यवहारका कारण छोटो समयमा लागु औषध छोड्न सफल भएको बताए। उनले अगाडि भने – “मानिसलाई सकारत्मक व्यवहार गरे सकारात्मक हुन्छ, नकारात्मक व्यवहार गरे नकारात्मक हुन्छ, कास्कीको प्रहरीका दाइहरु र साथीहरुले मलाई सकारात्मक व्यवहार गर्नुभयो, जसको कारण म छिटो पोजेटिभ भएर फर्किएँ।” र्‍यापर रानाले आफ्ना अडियन्सहरु युवा उमेरका भएकाले र आफूपनि कुलतबाट भर्खर छुट्न सफल भएकाले यस सचेतना कार्यक्रम मार्फत सप्ताहव्यापी कार्यक्रममा सहभागी हुन लागेको जानकारी दिए। उनले कार्यक्रममा आफ्नो प्रस्तुतिका साथै आफ्ना अनुभवहरु पनि सुनाउने बताए।

लागु औषधको कुलतमा कसरी फस्नुभयो ? र अबको अगाडिको यात्रा कसरी शुरु गर्नुहुन्छ ? भन्ने प्रश्नमा र्‍यापर लाहुरेले ‘कलेजबाट नै लागु औषधको लतमा फसेको बताए। उनले त्यो समयमा मन चन्चल हुने र दिमागमा सोच पनि धेरै आउने हुँदा मन र दिमाग बीचको द्वन्दले सही दिशा लिन नसक्दा आफू दुर्व्यसनीमा फसेको बताए। उनले अबका दिनमा सकारात्मक सोच र मेहनतका साथ अगाडि बढ्ने बताए।

कार्यक्रमलाई ‘नेपाल टुरिजम एन्ड होटल मेनेजमेन्ट’ कलेज, रिकभरी नेपाल र गोल्डेन आइटिभीले सहकार्य गरेका छन् ।