पोखरा। यहाँको पूरानो सामाजिक संस्था पोखरा जेसीजले वार्षिक कार्यक्रम अन्तर्गत यस वर्ष पनि विभिन्न कार्यक्रमको आयोजना गरी ‘जेसीज सप्ताह २०२२’ मनाउने भएको छ ।

जेसीजले बुधबार पोखरामा पत्रकार सम्मेलनको आयोजना गरी भदौ १७ देखि २३ गते सम्म सप्ताह व्यापी कार्यक्रम आयोजना गर्ने जनाएको हो । पत्रकार सम्मेलनमा बोल्दै संस्थाका कार्यकारिणी उपाध्यक्ष एवं मूल संयोजक कुशल पौडेलले रक्तदान कार्यक्रको आयोजना, निःशुल्क स्वास्थ्य शिविर, शैक्षिक सामग्री वितरण र सरसफाई तथा वृक्षारोपण कार्यक्रमको आयोजना गरिने बताए ।

त्यस्तै, कृषि सचेतना तथा माटो परिक्षण, साइबर क्राईम सम्बन्धी सचेतना र अन्तिम दिन ‘युवा नेतृत्व र उद्यमशिलता’ र ‘सफलताको लागि सहकार्य’ शिर्षकमा गण्डकी युवा वक्ता वक्तृत्वकला प्रतियोगिता आयोजना गरिने पौडेलले बताए ।

पहिलो, दोस्रो र तेस्रो स्थान हाँसिल गर्ने प्रतियोगीलाई १० हजार, ७ हजार र ५ हजार नगदसहित मेडल र प्रमाणपत्र प्रदान गरिने छ ।
पोखरा जेसीजका अध्यक्ष अध्यक्ष मिनराज खड्काले जेसीजले आफ्नो स्थापनाकालदेखि नै १८ देखि ४० बर्ष सम्मका युवाहरुलाई लक्षित गरी विभिन्न सामाजिक उत्तरदायित्व अन्तर्गत व्यक्तित्व र नेतृत्व विकासका लागि सक्रिय रुपमा कार्यहरु सञ्चालन गर्दै आइरहेको बताए ।

विभिन्न कार्यहरुमार्फत पोखरा जेसीजले राष्ट्रिय तथा अन्तर्राष्ट्रिय स्तरमा आफूलाई अब्बल सावित गर्न सफल भएको उनको भनाइ छ । निवर्तमान अध्यक्ष जेसी इन्जिनियर किरण केसीले जेसीज सामाजिक संस्थामात्र नभइ युवाहरुको संस्था समेत भएको बताए ।

सात दिवसीय कार्यक्रमका लागि ३ लाख १० हजार रुपैयाँ खर्च लाग्ने महासचिव प्रकाश घिमिरेले जानकारी दिए । कार्यक्रमको मुख्य प्रायोजकको रुपमा कृषि बिकास बैंक लमिटेड रहेको छ । एक्सपर्ट एकुजेशन सहप्रायोजकका रुपमा रहेको छ भने डिस मिडिया नेटवर्क, कुटी रिसोर्ट, कुमारी बैंक लिमिटेड, सर्वोत्तम सिमेन्ट, सर्वोत्तम स्टिल, वृज सिमेन्ट, सुन्दर सोफा तथा फर्निचर उद्योग, एल.एस मोटर्स निशान कम्पनी प्रायोजक संस्थाका रुपमा रहेका छन् ।

पोेखरा जेसीजमा हाल १ सय जना युवाहरु आवद्ध रहेका छन् ।