पोखराकाे न्यूरोडस्थित सिटिजन फर्निचर ट्रेड लिंकले मानव सेवा आश्रममा कक्ष निर्माण गरिदिने भएको छ । पोखरा २५ हेम्जा बाबियातरामा संचालित आश्रमको निर्माणाधिन भवनमा एउटा कक्ष सिटिजनले बनाइदिने भएको हो ।

सिटिजनका संचालक दीपक कार्कीले यसका लागि ५ लाख ५५ हजार ५५५ रुपैंया हस्तान्तरण गर्ने घोषणा गरेका छन् । आफू प्रमोटर रहेको एभरेष्ट मिडिया हाउसको दोस्रो वार्षिकोत्सवका अवसरमा आश्रम पुगेका कार्कीले कक्ष निर्माण गरिदिने बताएका हुन् ।

पोखराबाट प्रशारण हुने एभरेस्ट एफएम ९३ मेगाहर्जले पनि एउटा कोठा निर्माण गरिदिने भएको छ । आश्रम प्राङ्गणमै आयोजित वार्षिकोत्सव विशेष कार्यक्रममा एफएमले कक्ष निर्माणका लागि लाग्ने सवा पाँच लाख रकम मध्ये पहिलो किस्ता स्वरुप १ लाख रुपैयाँ शनिबार हस्तान्तरण गरेको छ । कार्यक्रममा एफएमकी अध्यक्ष कर्मकुमारी गुरुङले मानव सेवा आश्रमका पोखरा प्रमुख होमनाथ तिमिल्सिनालाई सो रकम हस्तान्तरण गरेकी हुन् ।

यसअघि एफएम सञ्चालन शुभारम्भको अवसरमा २०७७ सालमा पनि रेडियोले मानव सेवा आश्रम पोखरालाई १ लाख ५० हजार १ सय ११ रुपैयाँ प्रदान गरेको थियो ।

आश्रमको भवन निर्माण सम्पन्न गर्न र अक्षयकोष श्रीवृृद्धिको लागि ‘मानवताको लागि संगीतिक यात्रा’ भन्ने नाराका साथ पोखरामा आगामी पुष १२ गते नेपथ्य लाईभ कन्सर्ट हुने भएको छ । कन्सर्ट पोखराको नयाँबजार स्थित प्रदशनी केन्द्रमा हुने आश्रमका प्रमुख होमनाथ तिमिल्सिनाले जानकारी दिए ।