पोखरा । नेपाली कांग्रेस लमजुङका सभापति एवं गण्डकी प्रदेश सभा सदस्य डाक्टर टकराज गुरुङको सिफारिसमा लमजुङमा आर्थिक वर्ष २०७९/०८० का लागि विभिन्न योजना छनौट भएको छ ।

डा. गुरुङको निर्वाचन क्षेत्र समेत रहेको प्रदेश सभा ‘क’ मा विभिन्न ११ योजना छनौट भएको हो । तमु (गुरुङ) संग्रहालय, पर्यटन पूर्वाधार दूधपोखरी गाउँपालिका २ भुम्लीचोकमा ५० लाख, कोल्की भञ्ज्याङ मोटरबाटो मर्मत कार्य (ग्याभिन कार्य) दूधपोखरी गाउँपालिका ५ कोल्कीमा २० लाख, क्षेत्रीय खेल मैदान निर्माण कार्य गौलीटार राइनास नगरपालिका ६ धमिलिकुवामा २० लाख रुपैयाँ विनियोजन भएको छ ।

यस्तै, शैलपुत्री नमून मावि (खेल मैदान कम्पाउण्ड र पुस्तकालय) राइनास नगरपालिका ६ धमिलिकुवामा २० लाख, कुडुँले सामुदायिक भवन राइनास नगरपालिका ९ कुडुँले १५ लाख, कोयोँ टोल सामुदायिक भवन दोर्दी गाउँपालिका ८ बन्सारमा २० लाख, कर्म टासी छैलिङ खसु गुम्बा बेसीशहर नगरपालिका १० खासुरमा १० लाख, बाघेता खेल मैदान मस्र्याङ्दी गाउँपालिका ४ ताघ्रिङ रामबजारमा २० लाख, सम्बा छ्योइलिङ गुम्बा (पाहुना घर निर्माण) मस्र्याङ्दी गाउँपालिका २ घनपोखरामा १० लाख र थारचौर देखी बेसीशहर नगरपालिका–११ कार्कीडाँडासम्मको सडक स्तरोन्नती कार्य बेसीशहर नगरपालिका १०–११ मा १५ लाख रुपैयाँ विनियोजन भएको डाक्टर गुरुङले जानकारी दिनुभयो ।

यस्तै, प्रदेश सरकारको एक निर्वाचन क्षेत्र एक कृषि सडक कार्यक्रम अन्तर्गत कृषि ज्ञान केन्द्र लमजुङको परामर्शमा दोर्दी गाउँपालिका–१ बेलघारी भारते– लाकुरीभञ्ज्याङ सडक स्तरोन्नती कार्यका लागि एक करोड रुपैयाँ विनियोजन भएको छ ।

गुणस्तरीय र प्रभावकारी रुपमा छनौटमा परेका योजनाहरुको कार्यान्वयनका लागि गण्डकी प्रदेश सभा सदस्य डा. गुरुङले आग्रह गर्नुभएको छ ।