पोखरा जसीजले बार्षिक कार्यक्रम अन्तर्गत निरन्तरता दिँदै आएको जेसीज सप्ताह यही बैशाख १८ गतेदेखि २४ गतेसम्म हुने भएको छ । पोखरा जेसीजले शनिबार पत्रकार सम्मेलन गरी सात दिनसम्म विविध कार्यक्रमका साथ सप्ताह मनाउने जानकारी गराएको हो ।

जेसीज वीकेण्ड कार्यक्रम अन्तर्गत पहिलो दिन बैशाख १८ गते जेसीज सप्ताह शुभारम्भ तथा संसदीय बैठक प्रणाली तालिम सुशान्त पराजुलीको संयोजकत्वमा हुँदैछ । जहाँ पोखरा महानगरपालिकाका कार्यपालिका सदस्यलाई पोखरा सभागृहमा भेला गरी दिइनेछ ।

दोस्रो दिन १९ गते प्लस टु विद्यार्थीलाई वृत्ति विकास योजना परामर्श दिइनेछ । पर्यटन बोर्डको सभाहलमा हुने कार्यक्रमको संयोजक सुजन पोखरेल छन् ।

यसैगरी, सप्ताहको तेस्रो दिन वैशाख २० गते उद्यमी तथा व्यवसायीका वर्तमान अवस्था, चुनौती र अवसर विषयक गोष्ठी गरिने छ र संयोजक सञ्जय शर्माले तयारी तीब्र पारेका छन् । यो कार्यक्रम पनि पर्यटनबोर्डकै सभाहलमा हुनेछ ।

वैशाख २१ गते, चौथो दिन खेलकुद तथा शैक्षिक सामाग्री वितरण कार्यक्रम रहेको छ । मादी ९, कास्कीका हिमालय माविका विद्यार्थीलाई आवश्यक सामाग्री बाँडिने र यसको यसको संयोजन विवेक ढुंगानाले गरेका छन् ।

पाँचौ दिन २२ गते बृहत रक्तदान कार्यक्रमको आयोजना गरिएको छ । जेसीजकै सचिवालय रानीपौवामा हुने कार्यक्रमको लागि संयोजक सञ्जय कोइरालाले तयारी अघि बढाएका छन् ।

वैशाख २३ गते छैटौं दिन हुने कार्यक्रम निःशुल्क स्वास्थ्य तथा दन्त शिविर हुनेछ । मादी गाउँपालिका वडा नं. ४ मा हुने शिविरबाट ३, ४, ५ वडाबासी लाभान्वित हुने विश्वास छ । यसको संयोजकमा किरण आचार्य छन् ।

र, अन्तिम दिन वैशाख २४ गते गण्डकी युवा वक्ता तथा समापन कार्यक्रम हुनेछ । सचिवालय रानीपौवामै हुने कार्यक्रमको संयोजन सन्तोष लामिछानेले गरेका छन् । सम्पूर्ण तयारीहरु अन्तिम चरणमा रहेको यसका संयोजकहरुले बताएका छन् ।

जेसीज वीकइण्डका मुल संयोजक सुमन पहारीले सामाजिक क्रियाकलापमा युवाहरुको संलग्नता बढाउँदै सामाजिक संस्थाको जिम्मेवारी र उत्तरदायित्व पुरा गर्ने हेतुले वार्षिक रुपमा समाज लक्षित कार्यक्रम राखिएको बताए । उनले कार्यक्रम सञ्चालनका लागि ५ लाख ७० हजार खर्च लाग्ने र सो रकम विभिन्न संघसंस्था तथा जेसीज सदस्यहरुबाट संकलन गरिएको जनाए ।

कार्यक्रमको अध्यक्षता समेत गरेका पोखरा जेसीजका अध्यक्ष गणेश गिरीले युवा, विद्यार्थी लक्षित कार्यक्रमका साथै स्वास्थ्य सम्बन्धी यस्ता खालका कार्यक्रम वर्षेनी गर्दै आएको जनाए ।

पोकोम्याट एजुकेशन नेटवर्क प्रालिको मुख्य प्रायोजन रहेको छ भने नबिल बैंक र निफोठर्ड एकेडेमीले सहप्रायोजकका रुपमा साथ दिएका छन् । पोखरा मनपा, मादी गापा, पर्यटन बोर्ड र रक्तसञ्चार केन्द्रको सहकार्य रहेको छ ।