काठमाण्डौ। आइतबारको प्रतिनिधि सभा बैठक स्थगित भएको छ । प्रतिनिधि सभा बैठकमा एमालेसहित राष्ट्रिय स्वतन्त्र पार्टी र राप्रपाका सांसदले बिरोध गरेपछि अनेकौं प्रयासका बाबजुद सभामुख देवराज घिमिरेले संसद बैठक स्थगित गरेका हुन् ।

शुरूमा बैठक १ घन्टाका लागि स्थगित भनिएपनि सभामुखको कार्यकक्षमा भएको छलफलमा दलहरुबीच सहमति जुट्न नसक्दा बैठक सोमबारका लागि सरेको हो। आइतबार प्रतिनिधि सभा बैठक सुरू हुनासाथ एमाले, रास्वपा र राप्रपाका सांसदहरूले उठेर विरोध जनाएका थिए ।

विरोध जनाउँदै एमाले प्रमु्ख सचेतक पदम गिरीले कीर्ते गरेर नागरिकता विधेयक प्रमाणीकरण गरिएको आरोप लगाए ।

यस्तै, रास्वपाका प्रमुख सचेतक सन्तोष परियारले पनि संसदीय प्रक्रिया मिचेर नागरिकता विधेयक प्रमाणीकरण गरिएको बताए। भने, राप्रपा अध्यक्ष राजेन्द्र लिङ्देनले राष्ट्रपति संस्था साझा बन्न नसकेको र सरकारको छाया बनेको भन्दै संसदमा प्रधानमन्त्री आएर त्यसको जवाफ दिनुपर्ने बताए ।