आज ३३ औँ अन्तर्राष्ट्रिय ज्येष्ठ नागरिक दिवस । संयुक्त राष्ट्रसङ्घले सन् १९९० को डिसेम्बर १४ मा अक्टोबर १ तारिखलाई ‘अन्तर्राष्ट्रिय ज्येष्ठ नागरिक दिवस’का रुपमा मनाउने प्रस्ताव पारित गरेपश्चात् विश्वभरि नै आजको दिनलाई अन्तर्राष्ट्रिय ज्येष्ठ नागरिक दिवसका रूपमा मनाउने गरिएको छ ।

नेपालमा पनि विभिन्न कार्यक्रम गरी यो दिवस मनाइएको छ । पोखरा वडा नं. १५ कार्यालयले पनि वडाका ज्येष्ठ नागरिकलाई भेला पारी सम्मान तथा लौरो र फलफूल वितरण गरेको छ ।

कार्यक्रममा १ सय वर्ष नाघेका चित्र बहादुर खवास र नवलसिंह भण्डारीका साथै वडामा सञ्चालित ज्येष्ठ नागरिक मिलन केन्द्रका ८० वर्ष उमेर कटेका ४० जनालाई लौरो तथा फलफूल वितरण गरिएको वडा अध्यक्ष तोरणबहादुर बानियाँले जानकारी दिए ।

वडाध्यक्ष बानियाँले वडाका ज्येष्ठ नागरिकका सम्मानका लागि यो कार्यक्रम आयोजना गरिएको बताउँदै ज्येष्ठ नागरिकका लागि धार्मिक भ्रमणको तारतम्य वडाले मिलाउने बताए । उनले ज्येष्ठ नागरिक ज्ञान र अनुभवका खानी भएकाले उहाँहरुको कुरा र वचनमा अघि बढे सही ठाउँमा पुगिने बताए । त्यसैले हरेक परिवारले ज्येष्ठ नागरिक बुवा आमाको सम्मान र माया गर्नुपर्ने बताए ।

कार्यक्रममा कार्यपालिका सदस्यसमेत रहेकी वडा सदस्य मन्दिरा परियार, आशिष भण्डारी, बलराम पौडेल र सेतीमाया गुरुङकपनि उपस्थिति रहेको थियो ।

ज्येष्ठ नागरिक मिलन केन्द्र, शिवमन्दिरका कृष्णबहादुर खत्रीको अध्यक्षतामा भएको कार्यक्रमको सञ्चालन रामबहादुर बस्नेतले गरेका थिए ।

जन्मदिनमा कृष्णबहादुर खत्रीले अक्षयकोषमा दिए ५५ हजार ५ सय ५५

सोहि समारोहमा कृष्णबहादुर खत्रीले ज्येष्ठ नागरिक कोषमा ५५ हजार ५ सय ५५ रुपैंया दान गरी आफ्नो जन्मदिन मनाए । वडाअध्यक्ष बानियाँले जन्मदिनको शुभकामना दिँदै धन्यवाद ज्ञापन गरे । जन्मदिवसको अवसरमा खत्रीले कार्यक्रममा सहभागीलाई रोटी तरकारीको समेत व्यवस्था गरेका थिए ।

‘सबै पुस्ताका लागि ज्येष्ठ नागरिकका लागि मानवअधिकारबारे विश्वव्यापी घोषणापत्रको वाचा पूरा गरौँ’ भन्ने नारासहित विश्वभर यो दिवस मनाइएको हो । दिवसका अवसरमा महिला बालबालिका तथा ज्येष्ठ नागरिक मन्त्रालय, प्रदेश सरकार, स्थानीय तह र ज्येष्ठ नागरिकको क्षेत्रमा क्रियाशील राष्ट्रिय ज्येष्ठ नागरिक महासङ्घ तथा विभिन्न सङ्घसंस्थाले ज्येष्ठ नागरिकको हक, हित, संरक्षण र संवर्द्धनका लागि विभिन्न कार्यक्रम आयोजना गरेका छन् ।